პრემიერ-მინისტრის, მამუკა ბახტაძის განცხადებით, რუსეთის აგრესიის გამოწვევების წინაშე გაერთიანებული ერების ორგანიზაცია არაეფექტური გამოდგა და დღევანდელ მსოფლიოს უფრო ძლიერი გაერო სჭირდება.

გაეროს გენერალურ ასამბლეაზე სიტყვით გამოსვლისას პრემიერმა 2008 წლის აგვისტოს ომზე ისაუბრა. მისი თქმით, მსოფლიომ რუსეთის აგრესია მხოლოდ ორი ქვეყნის პრობლემად აღიქვა.

"მოვლენების შემდგომმა განვითარებამ უკრაინაში აჩვენა, რომ მაშინდელი მსოფლიო თანამეგობრობა არ აღმოჩნდა მზად, შესაბამისი შეფასება და რეაგირება მიეცა ამ აგრესიისთვის", - განაცხადა პრემიერმა.

მამუკა ბახტაძემ აღნიშნა, რომ დღეს მსოფლიო საზოგადოება საჭიროებს ისეთ ინსტიტუტებს, რომლებიც შეძლებენ არსებული გამოწვევები კონკრეტულად შეაფასონ და ადეკვატური რეაქცია მისცენ.

"გაეროს რეფორმირების იდეა 90-იანი წლებიდან მოდის, მაგრამ უნდა ვაღიაროთ, რომ ამ საქმეში სერიოზულ წარმატებაზე ვერ ვისაუბრებთ. ამიტომ, ვფიქრობ, რომ გაეროს რეფორმირების საკითხი კვლავ აქტუალურია და ის სასწრაფო გადაწყვეტას საჭიროებს", - განაცხადა მამუკა ბახტაძემ.

მამუკა ბახტაძის გამოსვლა გაეროს გენერალურ ასამბლეაზე

დღეს, 27 სექტემბერს გაეროს გენერალური ასამბლეის 73-ე სესიაზე, მამუკა ბახტაძემ ქართულად ისაუბრა. ეს იყო პირველი შემთხვევა, როდესაც საქართველოს პრემიერ-მინისტრმა გაეროს ტრიბუნიდან საერთაშორისო აუდიტორიას ქართულად მიმართა.