საქართველოს სახალხო დამცველის, ნინო ლომჯარიას შეფასებით, პოლიციელების მიერ შვილმოკლული მამების აქციაზე კარვების წართმევა პირად სივრცეში შეჭრაა. მისი შეფასებით, პარლამენტის შენობასთან კარვების გაშლა დასაშვები იყო.

"გამოხატვის თავისუფლების შესახებ კანონმდებლობა არ კრძალავს კარვების გაშლას ისეთ ადგილებში, სადაც ტრანსპორტის გადაადგილებას პრობლემა არ ექმნება, არ ბლოკავს შენობების შესასვლელებს და ასე შემდეგ. შესაბამისად, მშვიდობიან აქციაზე, როცა არ ექმნება საფრთხე გადაადგილებას, კარვების გაშლა არის დასაშვები", — ამბობს ლომჯარია.

საქართველოს შინაგან საქმეთა მინისტრის, გიორგი გახარიას თქმით, რუსთაველზე შვილმოკლულ მამებს კარვები იმ მოტივით არ გააშლევინეს, რომ შესაძლებელი იყო მომხდარიყო პროვოკაცია. ამის შესახებ მინისტრმა On.ge-ს ჟურნალისტის მიერ დასმულ კითხვაზე პასუხის გაცემისას განაცხადა.

გუშინ, 26 სექტემბერს ზაზა სარალიძემ განაცხადა, რომ როდესაც მანქანით მიდიოდნენ პარლამენტისკენ პოლიციამ მათ გზა გადაუკეტა და კარავი და სხვა ნივთები მანქანიდან წაიღო. როგორც სარალიძე აცხადებდა, მას თბილისის მერიასთან ჰქონდა შეთანხმება, რომ გაეშალა კარავი. სარალიძე პროტესტის ნიშნად რუსთაველის ცენტრალურ მაგისტრალზე გაწვა.

ფოტო: კადრი ვიდეოდან/ელისო კილაძე

პარლამენტთან მისვლის შემდეგ, ზაზა სარალიძემ და მისმა მხარდამჭერებმა რამოდენიმეჯერ სცადეს კარვების გაშლა, რასაც პოლიასა და მათ შორის სიტყვიერი და ფიზიკური დაპირისპირება მოჰყვა. საბოლოოდ კი, კარავი ბანერით და დროშებით ააწყეს.

ფოტო: გიორგი შეყელაძე