შინაგანს საქმეთა მინისტრის, გიორგი გახარიას თქმით, რუსთაველზე შვილმოკლულ მამებს კარვები იმ მოტივით არ გააშლევინეს, რომ შესაძლებელი იყო მომხდარიყო პროვოკაცია. ამის შესახებ მინისტრმა On.ge-ს ჟურნალისტის მიერ დასმულ კითხვაზე პასუხის გაცემისას განაცხადა.

"ერთმნიშვნელოვნად, შინაგან საქმეთა სამინისტრო იცავს და პატივს სცემს გამოხატვის თავისუფლებას. ჩვენი ჩვენი მუშაობის სტილით ეს არაერთხელ დავამტკიცეთ. ჩვენ ხომ არ ვართ მხოლოდ ამ კომპონენტზე პასუხისმგებელი. ჩვენ მართლწესრიგზე უაღრესად მნიშვნელოვანი ფუნქცია. როცა გვაქვს დასაბუთებული ინფორმაცია, რომ შესაძლოა, მოხდეს გარკვეული პროვოკაცია ჩვენ, რა თქმა უდნა, მართლწესრიგს ვიცავთ იმ ლეგიტიმური საშუალებებით, რაც გვაქვს", — განაცხადა გახარიამ.

შვილმოკლული მამების აქცია

ზაზა სარალიძე და მალხაზ მაჩალიკაშვილი საქართველოს პარლამენტთან მე-17 დღეა აქციას მართავენ. ზაზა სარალიძე ითხოვს მისი შვილის მკვლელისა და იმ ადამიანების დასჯას, ვინც მკვლელს ხელს აფარებდა, მალხაზ მაჩალიკაშვილი კი სპეცოპერაციის შედეგად დაღუპული შვილის საქმის გამოძიებას ითხოვს. მისი თქმით, თემირლან მაჩალიკაშვილი არ იყო დაკავშირებული ტერორისტებთან და სახელმწიფოს მხრიდან ადგილი ჰქონდა გადაცდომას.

ზაზა სარალიძემ აქციები 10 სექტემბერს მას შემდეგ განაახლა, რაც პარლამენტში შექმნილმა საგამოძიებო კომისიამ ანგარიში გამოაქვეყნა.

2018 წლის 31 მაისს ხორავას ქუჩაზე მომხდარი მკვლელობის საქმეზე მოსამართლემ განაჩენი გამოაცხადა, რომლის მიხედვითაც დავით სარალიძის მკვლელი უცნობია, რასაც დაზარალებული ზაზა სარალიძის მხრიდან პროტესტი მოჰყვა. მან ქუჩის გამოსვლების ორგანიზება დაიწყო.