თუ ცდილობთ, რომ სხვას დააჯეროთ, რომ თქვენ ნამდვილად ადამიანი ხართ, რას ეტყოდით მას? ალბათ რაიმეს ემოციებზე ან გრძნობებზე. მეცნიერებმა აღმოაჩინეს, რომ ადამიანები უფრო მეტად დაგიჯერებენ, თუ ისეთ სიტყვებს ახსენებთ, როგორიც მაგალითად განავალია.

ტურინგის ტესტი ერთ-ერთი მეთოდია, რომლითაც ვსაზღვრავთ რამდენად კარგად შეუძლია რობოტს ადამიანის მსგავსად აზროვნება. ტურინგის ტესტის ყველაზე მარტივი მაგალითი ხელოვნურ ინტელექტსა და ადამიანს შორის წერილობითი საუბარია, თუ ადამიანი ვერ ხვდება, მისი მოსაუბრე კომპიუტერია თუ ნამდვილი ადამიანი, კომპიუტერი ტესტს წარმატებით აბარებს.

მასაჩუსეტსის ტექნოლოგიური ინსტიტუტის მეცნიერების მიერ ჩატარებულ კვლევაში მონაწილეობა 1 089 ადამიანმა მიიღო. მათ სთხოვეს დაესახელებინათ სიტყვა, რომელიც ყველაზე მეტად გამოხატავდა ჩვენში ადამიანობას.

მონაწილეთა 47 პროცენტის მიერ არჩეული სიტყვები ისეთ საკითხებთან იყო კავშირში, როგორიც ემოციები, ფიქრი და გონებაა. ყველაზე პოპულარული სიტყვა კი სიყვარული იყო, რომელიც პასუხების 14 პროცენტს შეადგენდა.

კვლევის შემდეგ ეტაპში დამატებით 2 405 ადამიანი ჩაერთო. მეცნიერებმა ნათქვამი სიტყვები შემთხვევითობის პრინციპით წყვილებად დაალაგეს - მაგალითად ბანანი და სევდა, რის შემდეგაც მონაწილეებს უთხრეს, რომ ერთი მათგანი ადამიანის მიერ იყო ნათქვამი, ხოლო მეორე კი - რობოტის.

მონაწილეებს ევალებოდათ, გამოეცნოთ რომელი სიტყვა იყო ადამიანის მიერ ნათქვამი. ყველაზე ნაკლები ხმა სიტყვა "რობოტმა" მიიღო, რაც მოსალოდნელი იყო, თუმცა გასაკვირი ის სიტყვაა, რომელმაც ყველაზე მეტი ხმა მოაგროვა, რომელიც არც მეტი, არც ნაკლები, "განავალია."

ამას შეიძლება ის ფაქტი იწვევდეს, რომ სხვადასხვა ტაბუირებული სიტყვები ადამიანებში ძლიერ ემოციებს აღძრავს.

"ისეთი სიტყვები, როგორიც არის სიყვარული, პატიება და თანადგომა ადამიანებში ძლიერ ემოციებს იწვევს და ისინი მაღალ კოგნიტურ შესაძლებლობებთანაა კავშირში. თუმცა კვლევაში დავადგინეთ, რომ ადამიანებში ზოგჯერ უფრო ძლიერ ემოციებს ტაბუირებული სიტყვები აღძრავს," - ამბობენ კვლევის ავტორები.

ამ სტატიის გამოქვეყნების შემდეგ ახლა უკვე ნებისმიერ ხელოვნურ ინტელექტს შეუძლია, რომ ეს ინფორმაცია წაიკითხოს და ადამიანების შეცდომაში შესაყვანად ახალი სიტყვების გამოყენება დაიწყოს. ამიტომ შეიძლება ეს კვლევა ტურინგის ტესტის დროს ადამიანისა და რობოტის გარჩევაში არ გამოგვადგეს, თუმცა ის გვაწვდის ინფორმაციას იმაზე, თუ როგორ აღვიქვამთ ადამიანები საკუთარ თავს.