ლანჩხუთში, კულტურის სახლში პარტია ქართული ოცნების მიერ მხარდაჭერილი კანდიდატის, სალომე ზურაბიშვილის ხალხთან შეხვედრის დროს შენობასთან მოქალაქეთა ნაწილმა საპროტესტო აქცია მოაწყო. "არცერთი ხმა მოღალატეს", "აფხაზეთი ჩვენია, განგრენა შენ ხარ" — ამ პლაკეტებით კულტურის სახლთან მისულმა მოქალაქეებმა საპრეზიდენტო არჩევნებში ზურაბიშვილის შესაძლო გამარჯვება გააპროტესტეს.

"ვითხოვ იმას, რომ სალომე ზურაბიშვილი საქართველოში არ გახდეს პრეზიდენტი და მე მგონია, რომ ქართველი ხალხი გამოფხიზლდება და 48 ნომერს არ შემოხაზავს. ეს იქნება ძალიან დიდი დანაშაული ჩვენი ქვეყნისთვის", — განაცხადა აქციის ერთ-ერთმა მონაწილემ.

თავად ზურაბიშვილმა პროტესტი მისი კამპანიისთვის ხელის შეშლად შეაფასა.

"ეს არის კამპანიის ხელისშეშლა, ეს არ არის ევროპული კამპანია, რომელზედაც მე აპელირება გავაკეთე პირველი დღიდან. ეს არის, სამწუხაროდ, ძველი, საბჭოთა სისტემის გაგრძელება", — განაცხადა საპრეზიდენტო კანდიდატმა მხარდამჭერებთან შეხვედრის შემდეგ.

ეს პირველი შემთხვევა არაა, როცა სალომე ზურაბიშვილის საპრეზიდენტო კამპანია პროტესტის ფონზე წარიმართა. გუშინ, 24 სექტემბერს, ბათუმში ამომრჩეველთან შეხვედრის დროს საპრეზიდენტო კანდიდატს ერთ-ერთმა მოქალაქემ მოღალატე უწოდა. დარბაზში დამსწრეები კაცის დარბაზიდან გაყვანას ცდილობდნენ. ზურაბიშვილი კი ამბობდა, რომ მოქალაქისთვის თავი დაენებებინათ.