საქართველოს სოფლის მეურნეობის მინისტრის, ლევან დავითაშვილის თქმით, მარიხუანის წარმოება გარკვეულ აგრონომიულ ცოდნას მოითხოვს, რის გამოც ყველა ქვეყანაში იწარმოება მკაცრად რეგლამენტირებულ პირობებში.

მისივე განმარტებით, იმ ქვეყნებში სადაც ლეგალურად დაშვებულია ასეთი კულტურის წარმოება, არსებობს სპეციალური პირობები და მკაცრი კონტროლი.

"წარმოდგენილი კანონმდებლობაც ზუსტად ამას გულისხმობს, რომ ეს არ იქნება თავისუფალი კულტივირების პროდუქტი. ეს იქნება მკაცრად განსაზღვრული, ლიცენზიის პირობებით განსაზღვრული კულტივირების წესები", - განაცხადა ლევან დავითაშვილმა.

შსს-მ მარიხუანის მოხმარებისა და სამედიცინო მიზნით ექსპორტზე გასატანად კანაფის კულტივაციის რეგულირებისთვის ახალი კანონპროექტი შექმნა. აღნიშნული საკანონმდებლო ცვლილებების პაკეტი მთავრობას დღეს წარედგინა და ის მარიხუანის მოხმარების მკაცრ სამართლებრივ ჩარჩოებში მოქცევას გულისხმობს.

30 ივლისს საკონსტიტუციო სასამართლომ პარტია გირჩის წევრების სარჩელი დააკმაყოფილა, რომლის მიხედვითაც მარიხუანის მოხმარებისთვის ადმინისტრაციული სასჯელი გაუქმდა. შინაგან საქმეთა სამინისტრომ მარიხუანის მოხმარების კანონპროექტზე სწორედ ამის შემდეგ დაიწყო მუშაობა.

ჯანდაცვის კომიტეტის თავმჯდომარის, აკაკი ზოიძის განმარტებით, ინიციატივა მმართველმა გუნდმა 10 სექტემბერს, უმრავლესობის სხდომაზე განიხილა, ინფორმაცია შინაგან საქმეთა სამინისტრომაც დაადასტურა.

ამავე თემაზე: