კანაფის მოყვანა-წარმოებისთვის საჭირო რეგულაციებს სპეციალური სააგენტო გასცემს, რომლის შექმნაც შინაგან საქმეთა სამინისტროს მიერ მომზადებული კანონპროექტითაა გათვალისწინებული.

შს მინისტრის, გიორგი გახარიას თქმით, სააგენტო განსაზღვრავს ტარიფებს, ლიცენზიის საფასურს, იმ კონკურსის სახეობებს, რომლითაც ეს ლიცენზიები უნდა გაიცეს.

"სპეციალური სააგენტოს ფარგლებში დადგინდება, როგორც სალიცენზიო პირები, ისე კონკრეტული შემთხვევები და კონკრეტული პირობები, ასევე, სხვადასხვა საქმიანობაზე იქნება სხვადასხვა ლიცენზია. ეს არ შეიძლება იყოს მხოლოდ და მხოლოდ წარმოება, შეიძლება იყოს მოყვანა, წარმოება, გადამუშავება და ა.შ. ეს უნდა იყოს მკაცრად რეგულირებადი საქმიანობა, რომელსაც ეყოლება თავისი რეგულატორი, სადაც უმკაცრესი და რაც მთავარია, ეფექტიანი კონტროლის მექანიზმები იქნება აბსოლუტურად ღია, ტრანსპარენტული და ყველასთვის გასაგები", - განაცხადა შს მინისტრმა მთავრობის სხდომის დასრულების შემდეგ გამართულ ბრიფინგზე.

საქართველოს შინაგან საქმეთა სამინისტრო სამთავრობო გუნდთან ერთად მუშაობს კანონპროექტზე, რომელიც მარიხუანისგან წარმოებული მედიკამენტების ექსპორტზე გატანას გულისხმობს.

მარიხუანის მიერ დამზადებული სამედიცინო მედიკამენტების მოხმარება ლეგალურია მსოფლიოს არაერთ ქვეყანაში, მათ შორისაა დიდი ბრიტანეთი, ავსტრალია, ნიდერლანდები, აშშ-ს ზოგიერთი შტატი, კანადა, ურუგვაი, ისრაელში და პორტუგალია.