საზოგადოებრივი მაუწყებლის თანამშრომლები რეორგანიზაციასთან და სამუშაო პირობების ცვლილებასთან დაკავშირებით მენეჯმენტის გადაწყვეტილებას აპროტესტებენ. აქცია ტელევიზიის შენობასთან მიმდინარეობს.

საზოგადოებრივი მაუწყებლის პროფკავშირების თქმით, არხის მენეჯმენტმა 150-მდე თანამშრომელს ხელშეკრულების ახალი პირობები და საათობრივ ანაზღაურებაზე გადასვლა შესთავაზა. ცვლილება ტექნიკურ პერსონალს შეეხო. ხელშეკრულების შესასწავლად და ხელმოსაწერად ზოგიერთ თანამშრომელს ვადა 4 სექტემბერს ეწურებათ, თუ ისინი პირობებს არ დასთანხმდებიან სამსახურს დატოვებენ.

საზოგადოებრივი მაუწყებლის თანამშრომლები აქციაზე სიტყვის გამოსვლისას ამბობენ, რომ მენეჯმენტის გადაწყვეტილება გაუგებარია. მათივე თქმით, გაუგებარია რა პრინციპით შეარჩიეს ის თანამშრომლები, რომლებსაც ახალი პირობები შესთავაზეს. ასევე, ისინი აცხადებენ, რომ ახალი შეთავაზება გარანტიებს არ იძლევა.

როგორც თანამშრომლები ამბობენ, ახალი შეთავაზებით ისინი სამსახურში მაშინ მივლენ, როდესაც გამოიძახებენ. ახალგაზრდა იურისტთან ასოციაციის თავმჯდომარე და საზოგადოებრივი მაუწყებლის სამეურვეო საბჭოს ყოფილი წევრი, სულხან სალაძე ამბობს, რომ აღნიშნული ხელშეკრულება არ ავალდებულებს მენეჯმენტს წელიწადში ერთხელ მაინც გამოიძახოს ტექნიკური პერსონალი სამსახურში, რაც, მისივე თქმით, უპირობო გათავისუფლებას ნიშნავს.

აქციის მონაწილეები არხის მენეჯმენტთან და სამეურვეო საბჭოსთან შეხვედრა 4 აგვისტოს 12 საათზე სურთ. ნინო ზაუტაშვილის თქმით, თუ მენეჯმენტი კითხვებზე პასუხებს არ გასცემს, პროტესტს გააგრძელებენ.

საზოგადოებრივი მაუწყებლის განცხადებაში წერია, რომ ახალი პირობები 70-მდე თანამშრომელს შესთავაზეს. ისინი ცვლილებას საქმიაბობის ეფექტიანად წარმართვით ხსნიან.

მაუწყებელი დაეთანხმა სახელმწიფო აუდიტის სამსახურის 2015-2016 წლის დასკვნას, რომლის მიხედვითაც, საზოგადოებრივ მაუწყებელში აღრიცხვიანობის სისტემა იყო მოშლილი და ფაქტობრივად, აღრიცხვა არ ხორციელდებოდა. არხის მენეჯმენტის ინფორმაციით, 2018 წლის მაისში დასრულდა შენობაში დაშვება-კონტროლის სისტემის მოწყობილობების მონტაჟისა და გამართვის სამუშაოები, რის შესახებაც საზოგადოებრივი მაუწყებლის თანამშრომლები არაერთხელ იყვნენ გაფრთხილებული.