აშშ-ის პრეზიდენტი დონალდ ტრამპი ვაჭრობის მსოფლიო ორგანიზაციის (WTO) დატოვებით იმუქრება.

"თუ ის არ შეიცვლება, მე დავტოვებ ვაჭრობის მსოფლიო ორგანიზაციას", - განუცხადა ტრამპმა Bloomberg-ს.

WTO მსოფლიო ვაჭრობის წესების ჩამოსაყალიბებლად და ქვეყნებს შორის დავის მოსაგვარებლად შეიქმნა. ტრამპმა განაცხადა, რომ ორგანიზაციის შექმნის შესახებ 1994 წლის ხელშეკრულება ყველაზე ცუდი სავაჭრო შეთანხმება იყო ისტორიაში.

რატომ არის ტრამპი უკმაყოფილო

მას შემდეგ, რაც ტრამპი აშშ-ის პრეზიდენტი გახდა, WTO-ს "უსამართლო სავაჭრო პოლიტიკას" აკრიტიკებს. წინა წელს პრეზიდენტმა Fox News-თან განაცხადა: "WTO ჩვენი საერთო კეთილდღეობისთვის შეიქმნა, მაგრამ, თითქმის ყველა საქმეს ვაგებთ".

ბოლო რამდენიმე თვეა კი ამერიკა რამდენიმე ქვეყანასთან სავაჭრო ომს წარმართავს, მათ შორის, ჩინეთთან. მან ქვეყანაში იმპორტირებულ რამდენიმე საქონელზე საბაჟო გადასახადი მკვეთრად გაზარდა.

Bloomberg წერს, რომ მომავალი კვირისთვის თეთრი სახლი აპირებს, ჩინეთიდან იმპორტირებულ საქონელზე დამატებითი 200 მილიარდი დოლარის ოდენობის ტარიფები დააწესოს. კითხვაზე, შეესაბამება თუ არა ეს სიმართლეს, ტრამპმა უპასუხა, რომ "რომ ეს მთლად სიცრუე არაა".

თავის მხრივ ჩინეთმა ამერიკიდან იმპორტირებულ საქონელზე ტარიფები გაზარდა და, ამასთანავე, WTO-ში აშშ-ს უჩივლა. მათი თქმით, აშშ ვაჭრობის მსოფლიო ორგანიზაციის წესებს არღვევს.