როგორც იცით, მეცნიერებისა და ბიზნესმენების ნაწილი, მათ შორის, ილონ მასკი, ხელოვნურ ინტელექტს ჩვენი ცივილიზაციის ერთ-ერთ ყველაზე დიდ გამოწვევად და საფრთხედ მიიჩნევს. ეს ადამიანები თვლიან, რომ მოვლენების არასწორი კუთხით განვითარების შემთხვევაში ხელოვნურმა ინტელექტმა შეიძლება კაცობრიობას სერიოზული ზიანი მიაყენოს.

თუმცა ხელოვნურ ინტელექტზე მომუშავე ექსპერტების ნაწილი აცხადებს, რომ ეს შიშები უსაფუძვლოა. უფრო მეტიც, მაღალგანვითარებულმა ხელოვნურმა ინტელექტმა შესაძლოა მსოფლიო იმაზე ბევრად უფრო უკეთ მართოს, ვიდრე ეს ჩვენ შეგვიძლია.

"ხელოვნური ინტელექტის გარეშე კაცობრიობამ შესაძლოა საკუთარი თავი გაანადგუროს," - ამბობს მეცნიერი ტომას მიკალოვი, რომელიც ფეისბუქში ხელოვნური ინტელექტის თემაზე მუშაობს.

მეცნიერი აცხადებს, რომ როგორც სახეობა, ადამიანები ძალიან ბევრ ცუდ და არასწორ გადაწყვეტილებას ვიღებთ, რითაც საბოლოოდ საკუთარ თავს ვაზიანებთ. ჩვენ გავჩეხეთ ტყეები, გავანადგურეთ ეკოსისტემები, დავაბინძურეთ გარემო, გადაშენებამდე მივიყვანეთ უამრავი სახეობა და ა.შ.

მაღალგანვითარებულმა ხელოვნურმა ინტელექტმა შესაძლოა კაცობრიობა თვითგანადგურებისგან დაიცვას.

"ადამიანებს მომავლის გათვლა არც ისე კარგად გამოგვდის. სავარაუდოა, რომ ხელოვნური ინტელექტი ჩვენი მომავლის წინასწარმეტყველებას უკეთ შეძლებს და მოსალოდნელი საფრთხეებისგან უკეთ დაგვიცავს," - ამბობს მიკალოვი.

ტომას მიკალოვი მეცნიერთა იმ ნაწილს მიეკუთვნება, რომელიც ხელოვნური ინტელექტის შესახებ არსებულ შიშებს გადაჭარბებულად მიიჩნევს. პრაღაში ხელოვნური ინტელექტის თემაზე ჩატარებულ კონფერენციაზე მიკალოვთან ერთად სხვა მრავალმა მეცნიერმაც გამოთქვა საკუთარი აზრი, რომელთა უმეტესობამ ხელოვნური ინტელექტის შესაძლო უარყოფით მხარეებზე ისაუბრა.

ჯერ-ჯერობით უცნობია შევძლებთ თუ არა ოდესმე მაღალგანვითარებული ხელოვნური ინტელექტის შექმნას, რომელსაც ადამიანის მსგავსად აზროვნება შეეძლება. თუმცა ცხადია, რომ მის შექმნამდე ჩვენ უამრავი ეთიკური პრობლემის გადაჭრა მოგვიწევს.