მოძრაობა "რუსეთი ოკუპანტიას" წევრებმა და მხარდამჭერებმა ბათუმში ანტისაოკუპაციო აქცია გამართეს. მათ რუსთაველის გამზირზე, სასტუმრო შერატონის მოპირდაპირე მხარეს გზა ორმხრივად გადაკეტეს, რათა საზოგადოებისთვის კიდევ ერთხელ ეცნობინებითან რუსული ოკუპაციის შესახებ.

აქციის მონაწილეებს ვლადიმერ პუტინის გამოსახულებიანი პლაკატები ეჭირათ ხელში და სიმბოლურად, სადაც გზა იყო გადაკეტილი, მავთულხლართი იყო გავლებული.

ფოტო: გელა ბოჩიკაშვილი / On.ge

აქციის მონაწილეებთან შემდგომში პოლიცია მივიდა და გზიდან გადასვლა მოსთხოვა. სამართალდამცავები ცდილობდნენ, რომ გზის სავალ ნაწილზე გაბმული მავთულხლართები აეღოთ. პოლიციის მოთხოვნის შემდეგ აქციის მონაწილეებმა გზა გახსნეს.

რუსთაველის გამზირიდან მოძრაობის წევრებმა და მხარდამჭერებმა ერას მოედანზე გადაინაცვლეს. ერთ-ერთი შენობიდან აქციის მონაწილეებმა გადმოფინეს ინგლისურენოვანი ბანერი "მე ვარ საქართველოდან და ჩემი ქვეყანა ოკუპირებულია რუსეთის მიერ".

ფოტო: გელა ბოჩიკაშვილი / On.ge

ახალგაზრდულმა მოძრაობამ 23 აგვისტოს ღამით, ბათუმში რუსული ოკუპაცია გააპროტესტა და სხვადასხვა ქუჩაზე პუტინის გამოსახულებიანი პოსტერები გააკრა.

მოძრაობამ უკვე რამდენჯერმე გააპროსტესტა აქციით, რუსეთის ოკუპაცია და მოქალაქეებს მხარდაჭერისკენ მოუწოდა. 24 ივნისს სტიკერების გაკვრის დროს პოლიციამ ანტისაოკუპაციო მოძრაობის წევრები დააკავა.

მოძრაობამ აქცია ჭიდაობის ფედერაციასთანაც გამართა. ისინი საქართველოს ნაკრების მოჭიდავეებისგან, ჩრდილოეთ ოსეთის დეპუტატის და რუსეთის ნაკრების მთავარი მწვრთნელის, ჯაბო თადეევის სახიანი მაისურის ჩაცმას აპროტესტებდნენ და ფედერაციას ბოდიშის მოხდისკენ მოუწოდეს.