"რუსეთი ოკუპანტია" სტიკერების გაკვრისთვის მოქალაქეებზე ადმინისტრაციული საქმის წარმოება ქალაქის იერსახის დამახინჯების მუხლით დაიწყო. ამის შესახებ On.ge-ს შსს-ს პრესსამსახურში განუცხადეს.

მოძრაობის ერთ-ერთი წარმომადგენლის, ანა ჭარხალაშვილის თქმით, ისინი სარეკლამო ადგილებზე აკრავდნენ სტიკერებს, რა დროსაც პოლიციის ეკიპაჟებმა ისინი სამმართველოში გადაიყვანეს.

სამმართველოს დატოვების შემდეგ ჭარხალიშვილმა განაცხადა, რომ პოლიციამ რუსული მეთოდით იმოქმედა:

"როდესაც ახალგაზრდები ცდილობენ თავისი პროტესტი გამოხატონ სრულიად კანონიერად, გვაკავებენ, გვიქმნიან პრობლემას და როდესაც გვინდა, რომ ჩვენი მესიჯი გადავცეთ რუს ტურისტებს, რომ რუსეთი ოკუპანტია, ასეთი ხერხებით გვიშლიან."

გუშინ, 24 ივნისს გავრცელდა ინფორმაცია, რომ სტიკერების გაკვრის დროს პოლიციამ ანტისაოკუპაციო მოძრაობის წევრები დააკავა. შსს-ს განცხადებით, აღნიშნული პირები გამოვლენილნი იყვნენ და არა დაკავებულნი. საქმის წარმოება ადმინისტრაციულ სამართალდარღვევათა კოდექსის 150-ე მუხლით მიმდინარეობს, რაც 50 ლარიან ჯარიმას ითვალსიწინებს.