საქართველოს ფინანსთა სამინისტროს საგამოძიებო სამსახურის ინფორმაციით, თბილისსა და ბათუმში დიდი ოდენობით უაქციზო თამბაქოს შენახვა-გადაზიდვის ორი შემთხვევა გამოავლინეს.

გამოძიების ვერსიით, ბრალდებულები ელექტროსიგარეტისთვის განკუთვნილ HEETS ფირმის თამბაქოს ინახავდნენ და შემდგომი რეალიზაციისთვის გადაჰქონდათ. საგამოძიებო სამსახურის ინფორმაციით, ამოღებულია 1 618 კოლოფი უაქციზო სიგარეტი, რომლის საერთო ღირებულება 16 ათას ლარს აღემატება.

საქმეზე გამოძიება საქართველოს სისხლის სამართლის კოდექსის მე-200 მუხლის მეორე ნაწილით მიმდინარეობს. აღნიშნული მუხლით ჯგუფის მიერ წინასწარი შეთანხმებით დიდი ოდენობით აქციზური მარკების არაერთგზის დამზადება, გასაღება ან გამოყენება ისჯება თავისუფლების აღკვეთით ვადით ოთხიდან ექვს წლამდე.