კორეის ომის შედეგად დაშორებული ათობით ოჯახი ნათესავებსა და ოჯახის წევრებს 65 წლის შემდეგ შეხვდნენ. ბოლო 3 წლის განმავლობაში, ეს ომის შედეგად გაყოფილი ოჯახების პირველი შეხვედრაა, რომელიც ჩრდილოეთ კორეაში გაიმართა.

კორეის ომმა 1950-1953 წლებში ნახევარკუნძულის ორად გაყოფა გამოიწვია და ჩრდილოეთით დარჩენილ ხალხს ტერიტორიის დატოვების უფლება აღარ ჰქონდათ.

იმ ადამიანების უმრავლესობა, რომლებიც კორეის ომმა ერთმანეთს დააშორა, დღეს ასაკოვანია

იმ ადამიანების უმრავლესობა, რომლებიც კორეის ომმა ერთმანეთს დააშორა, დღეს ასაკოვანია

ფოტო: EPA

სამხრეთ კორეელები, რომლებიც წლების უნახავ ნათესავებს შეხვდნენ ლატარიის პრინციპით აარჩიეს, მათ შორის ყველაზე ასაკოვანი 101 წლისაა.

საერთო ჯამში, ერთმანეთს 83 ჩრდილოეთ და 89 სამხრეთ კორეელი შეხვდა. სულ ორივე მხრიდან 100 ადამიანი შეირჩა, თუმცა მათი ნაწილი შეხვედრას გამოეთიშა, როცა გაიგეს, რომ ოჯახის წევრები დიდი ხნის გარდაცვლილები იყვნენ.

92 წლის ქალი წლების შემდეგ თავის შვილს შეხვდა. მისი თქმით, შვილთან კავშირი მაშინ გაუწყდა, როცა ის ოთხი წლის იყო.

"ვერასდროს წარმოვიდგენდი, რომ ეს დღე დადგებოდა. მე ისიც კი არ ვიცოდი, ცოცხალი იყო თუ მკვდარი", - უთხრა მან AFP-ს.

ჩრდილოეთ და კორეის ლიდერები პირველად ერთმანეთს 27 აპრილს შეხვდნენ. 1953 წლის შემდეგ, კიმ ჩენ ინი ჩრდილოეთ კორეის პირველი ლიდერია, რომელმაც დემილიტარიზებული საზღვარი გადაკვეთა და სამხრეთ კორეის ტერიტორიაზე პრეზიდენტ მუნ ჯეი ენს შეხვდა.

სამიტის კულმინაცია ორ ლიდერს შორის გაფორმებული მშვიდობის დეკლარაცია იყო, რომლის მიხედვითაც ჩრდილოეთ და სამხრეთ კორეა მიმდინარე წელს ომის დასრულებაზე შეთანხმდა.