მეცნიერებმა ლეპტოპების, სმარტფონების და სხვა ელექტრონული მოწყობილობების მიერ გამოსხივებულ ლურჯი სინათლესა და სიბრმავის განვითარებას შორის კავშირი აღმოაჩინეს.

ტოლედოს უნივერსიტეტის მიერ ჩატარებული კვლევით გაირკვა, რომ ლურჯი სინათლე თვალში არსებულ რეცეპტორებში ტოქსიკურ მოლეკულებს წარმოქმნის, რაც თვალის ფოტოსენსიტიური უჯრედების გამოუსწორებელ გადაგვარებას იწვევს.

ლურჯ სინათლეს სხვა ფერებთან შედარებით უფრო მოკლე ტალღის სიგრძე და მაღალი ენერგია ახასიათებს, რაც ბადურას ნელ-ნელა აზიანებს.

ტოლედოს უნივერსიტეტის ქიმიისა და ბიოქიმიის დეპარტამენტის ასისტენტ-პროფესორი აცხადებს, რომ დღევანდელ სამყაროში ჩვენს თვალებს ლურჯ სინათლესთან შეხება ხანგრძლივი დროის განმავლობაში უწევთ, თვალს კი მისი დაბლოკვა ან არეკვლა არ შეუძლია.

"საიდუმლო არ არის, რომ ლურჯი სინათლე თვალის ბადურას აზიანებს. ჩვენმა ექსპერიმენტმა ამ პროცესის მიმდინარეობა ახსნა და იმედი გვაქვს, რომ ეს ცოდნა ბრძოლის ხერხების შემუშავებაში დაგვეხმარება", - აცხადებს მკვლევარი.

ბადურის ჩამოშლა 50 წელს გადაცილებულ ადამიანებში საკმაოდ ხშირად გვხვდება და ის მხედველობის ძლიერი დაქვეითებით ხასიათდება. მისი გამომწვევი მიზეზი თვალის ბადურაზე სინათლის აღმქმელი უჯრედების სიკვდილია.

ასაკთან ერთად ბადურის უჯრედების განადგურება ამერიკის შეერთებულ შტატებში სიბრმავის ერთ-ერთი მთავარი გამომწვევი მიზეზია. მართალია, ის სრულ სიბრმავეს არ იწვევს, მაგრამ მხედველობას ძლიერად აქვეითებს, ეს კი ყოველდღიურ საქმიანობას ერთიორად ართულებს.

ბადურაზე არსებულ მგრძნობიარე უჯრედებს სინათლის აღსაქმელად მოლეკულა რეტინალი სჭირდებათ. მეცნიერებმა აღმოაჩინეს, რომ ლურჯი სინათლე სწორედ რეტინალზე ახდენს გავლენას და უჯრედში ტოქსიკური ნივთიერებების წარმოქმნაც მისი მეშვეობით ხდება. ამ თეორიის გადასამოწმებლად მეცნიერებმა რეტინალი კუნთისა და კიბოს უჯრედებში შეიყვანეს და აღმოჩნეს, რომ ლურჯი სინათლის დანათებისას რეტინალი ამ უჯრედების კვდომასაც იწვევდა.

მკვლევრები ასევე აღნიშნავენ, რომ ბადურაზე არსებულ რეცეპტორებს რეგენერაციის უნარი არ აქვთ და მათი აღდგენა არ ხდება, თუმცა მეცნიერებმა სპეციალური მოლეკულა, ალფა-ტოკოფეროლი აღმოაჩინეს, რომელსაც ამ პროცესის ნაწილობრივი შეჩერება შეუძლია. სამწუხაროდ, ის ასაკოვან ადამიანებში სათანადოდ ვეღარ ფუნქციონირებს.

მეცნიერები გვირჩევენ, თვალის დასაცავად სპეციალური სათვალე გამოვიყენოთ, რომელიც ულტრაიისფერ და ლურჯ გამოსხივებას დაბლოკავს. ასევე რეკომენდებულია, რომ სიბნელეში მობილური ტელეფონები, ლეპტოპები და ტაბლეტები არ გამოვიყენოთ.