ადამიანების ფიქრები დღის განმავლობაში მუდმივად იცვლება, თუმცა მკვლევრების თქმით, მათი შინაარსი გარკვეულ კანონზომიერებებს მაინც ემორჩილება. ახალმა კვლევამ აჩვენა, რომ ადამიანების აზროვნება ოთხ ძირითად ტიპად შეიძლება დაიყოს. თუმცა, ეს კატეგორიები მკაცრად განსაზღვრული არ არის და ადამიანები დროთა განმავლობაში ერთი ტიპიდან მეორეში შეიძლება გადავიდნენ.

კვლევა კალიფორნიის Claremont Graduate University-ისა და ჩინეთის Wuhan University-ის ეკონომისტებმა ჩაატარეს. კვლევაში 19-დან 71 წლამდე ასაკის 258 ადამიანი მონაწილეობდა. ორი კვირის განმავლობაში სპეციალური აპლიკაცია მათ დღეში რვაჯერ, შემთხვევით დროს სთხოვდა, ჩაეწერათ, რაზე ფიქრობდნენ, რას აკეთებდნენ და რამდენად ბედნიერად გრძნობდნენ თავს. მკვლევრებმა 23 000-ზე მეტი პასუხი გააანალიზეს.

აი, ის 4 აზროვნების ტიპი:

მუდმივად შეშფოთებული

ამ ჯგუფის წევრები მსოფლიო მოვლენებზე, პოლიტიკასა და სოციალურ საკითხებზე საშუალოზე დაახლოებით 60%-ით ხშირად ფიქრობენ. მათი ყურადღება ხშირად ომებზე, COVID-19-ის პანდემიასა და სხვა მასშტაბურ მოვლენებზეა მიმართული. საკუთარ ჯანმრთელობასა და უსაფრთხოებაზეც ისინი საშუალოზე დაახლოებით 50%-ით მეტს ფიქრობენ.

მათ ფიქრებში ხშირად ჩნდება სიტყვები: COVID, სიფხიზლე, მარტოობა, ტკივილი, შიმშილი და დაღლილობა. საინტერესოა, რომ მუსიკაზე ისინი საშუალოზე თითქმის ორჯერ ხშირად ფიქრობენ. მკვლევრების ვარაუდით, ეს მათ, შესაძლოა, სტრესთან გამკლავებაში ეხმარებოდეთ.

ყოველდღიურ საქმეებზე ორიენტირებული

ამ ტიპის მოაზროვნეების ფიქრები ძირითადად პრაქტიკულ და საოჯახო საკითხებს უკავშირდება. ისინი საშუალოზე დაახლოებით 50%-ით ხშირად ფიქრობენ სახლის საქმეებზე, საცხოვრებელ გარემოსა და ფინანსებზე.

მათ ყურადღებას ასევე ხშირად იპყრობს ფილმების, წიგნებისა და სერიალების სიუჟეტები. ამ ჯგუფის წევრების ფიქრების აღსაწერად გამოყენებული სიტყვები საკმაოდ მრავალფეროვანი იყო, მათ შორის: "გადაწყვეტა", "პროცესი", "დისკუსია" და "დოკუმენტი".

სხეულსა და ემოციებზე კონცენტრირებული

საკუთარ შეგრძნებებზე, ემოციებსა და სამყაროს აღქმაზე ამ ჯგუფზე მეტად არცერთი სხვა ჯგუფი არ ფიქრობს.

მოაზროვნეების ეს ტიპი კვლევაში გამოვლენილ ჯგუფებს შორის ყველაზე ახალგაზრდაა — მისი წევრების საშუალო ასაკი 32 წელია, თითქმის ორი მესამედი კი ქალია. მათთან ყველაზე მაღალი იყო არასასურველი და მოულოდნელად გაჩენილი ფიქრების მაჩვენებელიც — 28%.

მათ ფიქრებში ხშირად გვხვდებოდა სიტყვები: "თერაპევტი", "ტკივილი" და "გადატვირთულობა". ამასთან, ამ ჯგუფში ხვდებოდნენ ის ადამიანებიც, რომლებსაც კვლევის პერიოდში ფიზიკური ან ფსიქიკური ჯანმრთელობის პრობლემები ჰქონდათ და ამიტომ უფრო ხშირად ფიქრობდნენ საკუთარ სხეულზე, სიმპტომებსა და მკურნალობაზე.

ის, ვინც ბევრს მუშაობს და ბევრს ერთობა

ამ ჯგუფის წევრების ფიქრები ძირითადად სამსახურსა და თავისუფალ დროს შორის ნაწილდება. ისინი სამუშაოზე საშუალოზე დაახლოებით 50%-ით ხშირად ფიქრობენ, თუმცა ჰობებს, თამაშებსა და ხელოვნებასაც დაახლოებით 25%-ით მეტ ყურადღებას უთმობენ. მათ ფიქრებში ხშირად ჩნდებოდა სიტყვები: "დასვენება", "პრეზენტაცია", "ფრენა", "ფრჩხილი", "პროექტი" და "სპორტდარბაზი".

სხვა ჯგუფებთან შედარებით მათ ყველაზე მაღალი შემოსავლისა და ბედნიერების მაჩვენებლები ჰქონდათ. ამ ჯგუფში კაცები ქალებზე ოდნავ მეტნი იყვნენ.