კანადელი რეჟისორისა და მსახიობის, ქსავიე დოლანის ახალი ფილმის The Death and Life of John F. Donovan, რომელსაც მსოფლიო სულმოუთქმელად ელის, ტორონტოს 43-ე კინოფესტივალზე ვიხილავთ.

რაც შეეხება უშუალოდ ფილმს, მასში მთავარ როლებს კიტ ჰარინგტონი, ნატალი პორტმანი, ჯეიკობ თრამბლი, სიუზან სარანდონი, ქეთი ბეიტსიც და ტენდი ნიუტონი ასრულებენ.

ფილმში მონაწილეობდა ჯესიკა ჩესტეინიც, მაგრამ გადაღებების დასრულების შემდეგ, ქსავიე დოლანმა მისი პერსონაჟის ყველა კადრი ფილმიდან ამოჭრა.

როგორც რეჟისორი განმარტავდა, ამის მიზეზი ფილმის ქრონომეტრაჟი იყო, რომელიც საბოლოოდ ოთხ საათზე მეტი გამოვიდა. რეჟისორი ამბობდა, რომ ეს მისთვის ყველაზე რთული გადაწყვეტილება იყო, რადგან ჩესტეინი მას გამუდმებით გვერდში ედგა, მათ შორის ამ ფილმის გადაღებების დროს.

ფილმის სიუჟეტი 2000-იან წლებში ვითარდება. დონოვანი (კიტ ჰარინგტონი) ამერიკული ტელევიზიის ვარსკვლავია, რომელიც დამწყებ მსახიობს (ჯეიკობ თრამბლი) და მის დედას (ნატალი პორტმანი) გაიცნობს ინგლისში. სწორედ აქედან იწყება ყველაზე დრამატული მოვლენები და გმირების ცხოვრება რადიკალურად იცვლება.