პრემიერ-მინისტრის მრჩეველი სოზარ სუბარი იმ მიზეზზე საუბრობს, რის გამოც ის საქართველოს პრეზიდენტობის კანდიდატი ვერ იქნება. მისი თქმით, პრეზიდენტი მისთვის მეორე საგარეო საქმეთა მინისტრია და ამ საკითხში ის არ არის ძლიერი.

"განხილვა იყო არაერთი კანდიდატის, მაგრამ გინდაც ჩემზე გაკეთებულიყო არჩევანი ვერ დავთანხმდებოდი ცხადი იყო. იმ სამსახურში, რომელიც პრემიერმა ჩამაბარა თავს ვგრძნობ მშობლიურ გარემოში, მგონია, რომ ქვეყნის შიგნით უფრო მეტი რამის გაკეთება შემიძლია", - ამბობს ქრონიკასთან საუბარში სოზარ სუბარი.

ქართული ოცნების დამფუძნებლისა და თავმჯდომარის, ბიძინა ივანიშვილის თქმით, მისი პოზიციაა, რომ საპრეზიდენტო კანდიდატი გუნდიდან არ დაასახელონ. მისი თქმით, მისი პოზიციაა, რომ დამოუკიდებელ ღირსეულ კანდიდატს დაუჭირონ მხარი და თუ ასეთი არ იქნება, არავის დაუჭირონ მხარი და "ოპოზიციამ გაინაწილოს ეს ინსტიტუტი".

პრემიერ-მინისტრმა, მამუკა ბახტაძემ კი განაცხადა, რომ ქვეყნის დემოკრატიისთვის უკეთესი იქნება, თუ არჩევნებზე ოცნებას კანდიდატი არ ეყოლება. პარლამენტის ვიცე-სპიკერი გია ვოლსკი კი აცხადებს, გუნდში მიმდინარეობს მსჯელობა, რომ ან სალომე ზურაბიშვილს დაუჭერენ მხარს, ან საერთოდ არ ჩაერევიან ამ პროცესში.