ევროპულმა კოსმოსურმა სააგენტომ მათი ახალი როვერისთვის სახელის შესარჩევად კონკურსი გამოაცხადა. ამ მიზნით სააგენტომ სპეციალური ვებგვერდი შექმნა, სადაც მარტივი ფორმის შევსების შემდეგ მსურველებს საკუთარი ვერსიის გაგზავნა შეუძლიათ.

თვითმავალი რობოტის გაგზავნა მარსზე 2020 წელს იგეგმება. ის წითელ პლანეტაზე სიცოცხლის არსებობის შესაძლო ნიშნებს მოძებნის და ეცდება გაარკვიოს, თუ როგორ იცვლებოდა და ყალიბდებოდა მასზე გარემო პირობები. როვერს სპეციალური ბურღიც გააჩნია, რომელსაც ზედაპირიდან ორი მეტრის სიღრმეზე შეუძლია ჩაღწევა. ასე რომ, თუ მარსის ქვეშ პაწაწინა უცხოპლანეტელები ცხოვრობენ, მალე ისინი ვეღარსად დაგვემალებიან.

წარსულ გამოცდილებაზე დაყრდნობით ვიცით, რომ სახელის შესარჩევად ინტერნეტში კონკურსების გამოცხადება ცოტა სარისკოა, ამიტომაც როვერის დასახელებაზე საბოლოო გადაწყვეტილებას მეცნიერთა საბჭო მიიღებს.

გამარჯვებული სახელის ავტორი ინგლისში Airbus-ის ქარხანაში გაემგზავრება, სადაც როვერის აწყობის პროცესს დაესწრება.