ლენტეხის სოფელ ზესხოში, ტყეში გაჩენილი ხანძრის ლოკალიზებაში შსს-ს სასაზღვრო პოლიციის ვერტმფრენი ჩაერთვება. ინფორმაციას საგანგებო სიტუაციების მართვის სამსახური ავრცელებს.

ამ დროის მონაცემებით, დამწვარია 2,5 ჰა ფართობი. ხანძრის ქრობის პროცესი მთელი ღამის განმავლობაში მიმდინარეობდა.

უწყების განმარტებით, რთული რელიეფის გამო ადგილზე მობილიზებულია ცოცხალი ძალა. ცეცხლის ქრობაში ჩართულია 120 მეხანძრე-მაშველი. ასევე, სამეგრელო-ზემო სვანეთის სატყეო სამსახურის თანამშრომლები.

მეხანძრე-მაშველებმა ცეცხლის რამდენიმე ღია კერის ლიკვიდირება მოახერხეს. ადგილზე მობილიზებულია დამატებითი ჯგუფები თბილისიდან და იმერეთის რეგიონიდან.