საქართველოს პროფკავშირების გაერთიანების განცხადებით, ოთხთვიანი მოლაპარაკებების შედეგად თბილისის სატრანსპორტო კომპანიის თანამშრომლებს დამატებითი ბენეფიტები უწესდებათ.

მიღწეულ შედეგებს შორის არის:

• მეტროს თანამშრომლებისთვის ღამის საათებში მუშაობის დანამატის 10 პროცენტიანი ზრდა;
• მოიხსნება თანრიგების დაცვის სისტემა და ამავდროულად გაიზრდება ტარიფები მე-6 თანრიგის 100 ლარამდე. მე-5 თანრიგისათვის 70 ლარამდე და მე-4 თნრიგისათვის 50 ლარამდე;
• ამავე დროს, თანრიგების მიმნიჭებელ კომისიაში, ხმის უფლების მანდატი მიეცემათ მეტროს და ტრანსპორტის პროფკავშირების წარდგინებით, პირველადი პროფკავშირული ორგანიზაციების წარმომადგენლებს;
• საწარმოს სამსახურის ტექნიკური მეცადინეობების (გადამზადების) დრო, რომელიც ადმინისტრაციის ორგანიზებით ტარდება თანამშრომლებისთვის თვეში ერთხელ ანაზღაურდება 20 ლარით;
• საწარმოში დასაქმებული ყველა ბრძანების ასლი, რომელიც ეხება დასაქმებულთა სოციალურ ეკონომიკურ საკითხებს, მათ შორის, მიღებისა და გათავისუფლების ბრძანების ასლები, სამი დღის ვადაში გადაეცემა პროფკავშირს;
• მეტროს თანამშრომლებისთვის, მეტროს პროფკავშირის შუამდგომლობით დაწესდება ყოველწლიური "საპატიო მეტროპოლიტენელი" წოდების მინიჭება, წამახალისებელი ფულადი ჯილდოს თანხლებით;
• კომპანიაში დასაქმებული ე.წ. ბუქსირის მძღოლებისთვის განისაზღვრება მავნე პირობებში მუშაობის დანამატი;
• სამეურნეო მანქანის მძღოლები დანამატის სახით - მავნე სამუშაოსთვის, ათდღიან დამატებით ანაზღაურებად შვებულებას მიიღებენ;
• ივლისსა და აგვისტოში, ძლიერი სიცხის გათვალისწინებით, მცირე ზომის ყვითელი ავტობუსების "ბოგდანების" მძღოლები იქნებიან უზრუნველყოფილნი წყლით ან მიიღებენ შესაბამის დანამატს 50-50 ლარის ოდენობით;
• თბილისის მერმა კახა კალაძემ განაცხადა, რომ მზადაა დაარეგულიროს ე.წ მშრალი ოქმი საკითხი, რაც გულისხმობს მცირე საავტომობილო ინცინდენტების დროს (რომელიც არ იწვევს სხვისი ნივთის ან ვინმეს დაზიანებას და ეხება საავტომობილო საშუალების შედარებით მსუბუქ დაზიანებას, გახახუნებას და ა.შ) მძღოლების 250-ლარიანი ჯარიმისგან გათავისუფლებას. კახა კალაძემ განაცხადა, რომ მზადაა საკითხი დაარეგულიროს შსს-სთან და საპატრულო პოლიციასთან;
• დეკემბრიდან იანვრამდე მეტროპოლიტენის თანამშრომელთა შრომით ხელშეკრულებებში შევა ცვლილება და მათ აუნაზღაურდებათ ნახევარსაათიანი ე.წ. გამოუყენებელი შესვენება. რომელიც ჯამში შეადგენს 600 ათას ლარს და რომლისთვისაც თანხები ამ ეტაპზე ბიუჯეტში ვერ გამოიძებნა;
• პროფკავშირთან კოლექტიური ხელშეკრულების შედეგად საწარმოში არსებული წელთა ნამსახურების დანამატი გავრცელდება მძღოლებზეც და ამ თანხას ისინი, ისევე როგორც მეტროს თანამშრომლები მიიღებენ წლის დასრულებისთანავე;
• დეკემბერ-იანვარში გაფორმდება კოლექტიური შეთანხმება, რომელშიც ჩაიდება როგორც ძველი მიღწევები, ასევე ახალი სხვადასხვა საკითხი, რომელიც გააუმჯობესებს კომპანიაში დასაქმებულთა სოციალეკონომიკურ მდგომარეობას.

ხელფასების ზრდის მოთხოვნით თბილისის მეტროს მემანქანეები და სხვა თანამშრომლები 2 ივნისს დაიწყეს, რამაც ქალაქის პარალიზება გამოიწვია. მეტროს მემანქანეები მოითხოვდნენ, რომ მათი თანამდებობრივი სარგო 45 პროცენტით გაზრდილიყო.

რამდენიმე დღის შემდეგ, 6 ივნისს მემანქანეებმა გაფიცვა შეწყვიტეს და მუშაობა განაახლეს. მემანქანეების თქმით, მერია მათ დაჰპირდათ, რომ ხელფასები ეტაპობრივად გაეზრდებათ, თუმცა კონკრეტული თარიღები უცნობია.