კომუნიკაციების ეროვნული კომისიის გაფრთხილების მიუხედავად, Myvideo არ აპირებს პირველი და მეორე არხების ტრანსლირების შეწყვეტას მსოფლიო ჩემპიონატის საფეხბურთო მატჩების დროს. ამის შესახებ დღეს, 2 ივლისს კომპანია Myvideo-ს წარმომადგენლებმა პრესკონფერენცია გამართეს და განაცხადეს, რომ გეგმავენ სასამართლოს გზით გააგრძელონ დავა.

კომპანიაში მიზეზად კი იმას ასახელებენ, რომ არაფრით განსხვავდებიან მათი კონკურენტებისგან, როგორიც არის მაგთი TV, SILK TV და სხვა საკაბელო და ციფრული ტელევიზია:

"კანონის მიხედვით, [საზოგადოებრივ მაუწყებელს] არ აქვს უფლება მოახდინოს განსხვავებული პირობების დაწესება, რომელიმე ცალკეული ტრანზიტორისათვის. ზუსტად აქედან გამომდინარეობს მათი მოთხოვნის დისკრიმინაციულობა. Myvideo არის ერთადერთი ქართული სოცილური მედია პროექტი, რომელსაც ჰყავს ორ მილიონზე მეტი ლოიალური მომხმარებელი".

Myvideo აცხადებს, რომ საზოგადოებრივი მაუწყებელი ინტერნეტ სარეკლამო ბაზარზე მომუშავე კომპანიების შევიწროვება განიზრახეს, რაშიც მათივე თქმით, ეხმარება კომუნიკაციების ეროვნული კომისია.

საზოგადოებრივი მაუწყებლის განცხადებით, ლოგიკას მოკლებულია Myvideo-ს პოზიცია, იდავოს იმ პროდუქციის ტრანზიტზე, რომელზეც ლიცენზია მას არ ეკუთვნის:

"ფეხბურთში 2018 წლის მსოფლიო ჩემპიონატის ჩვენების ექსკლუზიურ უფლებას საკუთარ პლატფორმებზე (ტელევიზია, ვებგვერდი, მობილური აპლიკაცია) ფლობს საზოგადოებრივი მაუწყებელი, რომელიც სრულად უზრუნველყოფს მატჩების მაღალი ხარისხით ტრანსლირებას მთელი საქართველოს მასშტაბით ყველა შესაძლებელი საშუალებით".

საზოგადოებრივი მაუწყებლის განცხადებაში ნათქვამია, რომ Myvideo-სთან გამართული მოლაპარაკების მიუხედავად, კომპანიამ უგულვებელყო მათი ყველა მოთხოვნა და კვლავ აგრძელებს ე.წ. პირატულ ტრანზიტს.

FIFA-ს რეგულაციების თანახმად, საზოგადოებრივ მაუწყებელს უფლება აქვს მხოლოდ თავის პლატფორმებზე განახორციელოს ჩემპიონატის ტრანსლაცია, ამავდროულად დაემორჩილოს კონტრაქტით ნაკისრ მკაცრ ვალდებულებებს.

კომუნიკაციების ეროვნული კომისიის გადაწყვეტილების თანახმად, Myvideo-მ დაუყოვნებლივ უნდა შეწყვიტოს საზოგადოებრივი მაუწყებლის არხების ტრანზიტი გაურკვეველი წყაროდან, განახორციელოს მხოლოდ საზოგადოებრივი მაუწყებლის მიერ მიწოდებული სიგნალის ტრანზიტი (შესაბამისი მოთხოვნის შემდეგ) მოდიფიცირების გარეშე.