თუ ინტერნეტში მიმდინარე ამბებს 2011 წელსაც ისე გულმოდგინედ ადევნებდით თვალს, როგორც ახლა, აუცილებლად გემახსოვრებათ 13 წლის რებეკა, სიმღერით Friday.

კლიპი გამოსვლიდან ძალიან მალე გავირუსდა2 კვირაში მას უკვე 100 მილიონი ნახვა ჰქონდა. რებეკა კი მსოფლიოს ყველა კუთხიდან განხილვის საგანი გახდა.

თუმცა ეს პოპულარობა ნამდვილად არ ყოფილა 13 წლის გოგოსთვის საოცნებო, რადგან ვიდეოს დადებითი რეაქცია არ გამოუწვევია - ის მილიონობით ადამიანის კრიტიკის, დაცინვისა და ტროლინგის ეპიცენტრში მოექცა.

7 წლის შემდეგ, 20 წლის რებეკამ Talent Recap-ში მიიღო მონაწილეობა და მოყვა, რომ იმ აგრესიისთვის რაც მიიღო, ის მზად არ ყოფილა:

"როცა 13 წლის ვიყავი, მქონდა სიმღერა, სახელად Friday. მას უამრავი დადებითი ჰქონდა ჩემთვის, თუმცა ასევე ბევრი ცუდი მოყვა, რადგან უამრავ ადამიანს ის არ მოეწონა.

როდესაც ის ინტერნეტში განთავსდა, თვალის დახამხამებაში ყველაფერი შეიცვალა.

ყველგან იყო სიძულვილის შემცველი კომენტარები. ამისთვის არავინ გამზადებს. და ეს ძალიან სასტიკია, როცა მხოლოდ 13-ის ხარ. იყვნენ ადამიანები, რომლებიც ამბობდნენ, რომ დედამიწაზე ჩემი ადგილი არ იყო.

როდესაც პირველად კომენტარები ვნახე, ვიტირე. ვიფიქრე, რომ ყველაფერი ჩემი ბრალი იყო და და ეს ვიდეო სულ არ უნდა ჩამეწერა. ახლა ასე აღარ ვფიქრობ.

იყო სიტუაცია, როცა მზად ვიყავი მუსიკაზე უარი მეთქვა. მაგრამ არასდროს არავის უნდა მისცე უფლება, შენს საყვარელ საქმეზე უარი გათქმევინონ".

მუსიკალურ შოუში რებეკამ Bye Bye Bye შეასრულა და ჟიურის მოწონებაც დაიმსახურა, თუმცა მომდევნო ეტაპზე ის ვერ გადავიდა. სამაგიეროდ ყველას უთხრა, რომ რაც უყვარს იმის კეთებას არასდროს შეწყვეტს.