პოპულარული ბრიტანული დისტოპიური სერიალის Black Mirror-ის ახალი სეზონი Netflix-ზე 21 ოქტომბერს გამოვა.

სერიალის ბოლო ეპიზოდი 2013 წელს გამოვიდა, ხოლო სპეციალური ეპიზოდი, ე.წ. Special - 2014 წლის დეკემბერში.

სერიალს თითო სეზონში მხოლოდ სამი სერია აქვს, რაც, რა თქმა უნდა, მაყურებლისთვის საკმარისი არ არის, მით უმეტეს, თუ ეს სერიალი ერთ-ერთი საუკეთესოა.

Netflix-ის დაანონსებულ მესამე სეზონში 12 ეპიზოდი იქნება, რაც სერიალის ფანებისთვის უდიდესი საჩუქარია.

როგორც წესი, ბრიტანული სატელევიზიო ფორმატით, სერიალებს, რამდენიმე გამონაკლისის გარდა, 3-8 ეპიზოდი აქვთ სეზონში. როგორც ზემოთ აღვნიშნეთ, Black Mirror-ის სეზონები მხოლოდ 3 ეპიზოდისგან შედგებოდა, 12 სერიიანი სეზონის გამოსვლა კი იმის ტოლფასია, რომ შოუს შემქმნელებმა ერთდროულად მთელი 4 სეზონი გადაიღეს.

ახალი ეპიზოდები Netflix-ზე მთელს მსოფლიოში იქნება ხელმისაწვდომი, მათ შორის საქართველოშიც.

თამამად შეიძლება ითქვას, რომ Black Mirror ბოლო წლების ერთ-ერთი საუკეთესო სერიალია. ყოველ ეპიზოდში ახალი ისტორიაა მოთხრობილი, რომელიც ახლო მომავალში ვითარდება და ერთმანეთში სამეცნიერო ფანტასტიკას, დრამასა და სატირას აერთიანებს.

თუ როგორღაც მოახერხეთ და აქამდე ეს სერიალი ნანახი არ გაქვთ, აუცილებლად უყურეთ. 21 ოქტომბრამდე დიდი დროა და მოასწრებთ, თან დიდი ხნით ლოდინიც არ მოგიწევთ.