6 აგვისტოს ბათუმს ბრიტანული ელექტრონული როკ-ბენდი The Qemists ეწვევა. ჯგუფი ლაივ შოუების მაღალი ხარისხით და ცოცხალი შესრულებით გამოირჩევა.

On.ge-ს ბენდთან ინტერვიუს ჩაწერის შესაძლებლობა მიეცა. ჩვენთან საუბარში ჯგუფის წევრებმა განაცხადეს, რომ ქართველ მსმენელს დიდ სიყვარულსა და ენერგიას ჰპირდებიან და თავადაც იგივეს მიღების მოლოდინი აქვთ.

როგორ გრძნობთ თავს საქართველოში ჩამოსვლისა და ქართველ ფანებთან შეხვედრის წინ?

მოუთმენლად ველით საქართველოში ჩამოსვლასა და კონცერტის გამართვას. ყოველთვის გვახარებს ახალ ადამიანებთან და კულტურასთან შეხვედრა, განსაკუთრებით კი მათთან, ვისთანაც კონცერტზე საუცხოო დროს ვატარებთ.

სიმღერებს მხოლოდ ახალი ალბომიდან შეასრულებთ, თუ წინა ორიდანაც?

ვაპირებთ ჩვენი პირველი ორი ალბომიდან ჰიტების შესრულებას, თუმცა აუცილებლად გიმღერებთ Warrior Sound-იდან. წარმოუდგენლად გვახარებს თქვენთან სტუმრობა და სიმღერა.

გვახსოვს თქვენი კოლაბორაცია პოპულარული მუსიკალური ბენდების სოლისტებთან. რომელი მათგანი იყო თქვენთვის ყველაზე დასამახსოვრებელი?

ვერ გამოვყოფთ ერთს, როგორც ჩვენთვის ყველაზე პოზიტიურ მოვლენად, რადგან თითოეული მათგანი განსხვავებული და დაუვიწყარი გამოცდილება იყო, Faith No More, Crossfaith, Enter Shikari, Skindred და Hacktivist - თითოეულ მათგანთან თანამშრომლობა საუცხოო გამოცდილება იყო ჩვენთვის.

ვინ იყო თქვენი შთაგონების წყარო, სანამ მუსიკალურ კარიერას დაიწყებდით?

რადგან ჯგუფში 5 მუსიკოსი ვართ, მათი სია ცოტა გრძელია. ყველა ჩვენგანი უსმენდა როკს, მეტალს, ჰიპ-ჰოპს და საცეკვაო მუსიკას. Korn, Public Enemy, Rage Against The Machine, The Prodigy... ისინი ნამდვილად წარმოადგენენ ჩვენი ინსპირაციის წყაროს.

რა არის ყველაზე დაუვიწყარი მოგონება თქვენი მუსიკალური კარიერიდან? სიამოვნებით მოვისმენ ჯგუფის თითოეული წევრის პასუხს.

ყველა ჩვენგანისთვის საოცარი გამოცდილება იყო პოლონეთში, ვუდსტოკის ფესტივალზე, გამოსვლა. დაუჯერებლად კარგი იყო. ესაა უდიდესი ფესტივალი მსოფლიოში, სადაც ასობით ათას ადამიანს უფასოდ შეუძლია დასწრება. Damian Marley-ს შემდეგ, ფესტივალის მორიგ დღეს ჩვენ ვხსნიდით და მსმენელთა რაოდენობა 300 ათასს აღწევდა. დაუვიწყარი იყო. ასევე კონცერტი იაპონიაში. ძალიან გვიყვარს ეგ ადგილი.

რა მოლოდინი გაქვთ თქვენს ქართველ მსმენელზე და რას უნდა ელოდონ ისინი 6 აგვისტოს?

ჩვენ აქამდე არასდროს ვყოფილვართ საქართველოში, თუმცა გვსმენია ბევრი საუცხოო რამ თქვენს სცენაზე, ასე რომ, გვსურს მალე შეგხვდეთ და გავერთოთ. გპირდებით დიდ სიყვარულსა და ენერგიას და იმედი გვაქვს, რომ ქართველი ფანებიც იგივეს გადმოგვცემენ. ვაპირებთ რომ დაგანგრიოთ ჩვენი მუსიკით!!

სად და როდის გეგმავთ თქვენს მომავალ ტურს?

ამ ზაფხულს უამრავ ფესტივალზე ვიქნებით და დარწმუნებულნი ვართ, რომ ტური წლის ბოლომდე და მის შემდეგაც გაგრძელდება.

მუშაობთ ახალ ალბომზე?

როგორც კი Warrior Sound გამოვუშვით, ახალ ალბომზე დავიწყეთ მუშაობა. ამის შესახებ ბევრი საუბრის უფლება ჯერ არ გვაქვს, თუმცა გარწმუნებთ, რომ Qemists-ის ფანებს ჩვენი ახალი მუსიკისთვის დიდი ხნით ლოდინი არ მოუწევთ.

სად ისურვებდით მომავალ ტურს და რომელ მუსიკოსთან ითანამშრომლებდით სიამოვნებით?

ვისურვებდით Prophets of Rage-სთან ერთად ტურის მოწყობას, საუცხოო იქნებოდა!

რომელია თქვენი საყვარელი ბენდი?

Enter Shikari, Crossfaith, Skindred და Hacktivits.

აპირებთ საქართველოში რაღაც დროით დარჩენას კონცერტის შემდეგ?

ზუსტად არ ვიცით, თუმცა სიამოვნებით დავრჩებოდით. გარანტიას გაძლევთ, რომ კონცერტის ღამეს საქართველოში გავატარებთ.

ღონისძიება საღამოს 8 საათზე დაიწყება. ბილეთების შეძენა დაწყებულია როგორც ონლაინ, ისე ბათუმისა და თბილისის სალაროებში:

  • ონლაინ: tkt.ge
  • თბილისი, ფილარმონიის სალარო, მელიქიშვილის N1 (12 ივლისიდან) ტელ.: 298 76 82
  • ბათუმი, ბათუმის ბულვარი, ბათუმის ჩოგბურთის კლუბის (კორტების) ადმინისტრაციული შენობა (12 ივლისიდან) ტელ.: 571 331 774