შინაგან საქმეთა სამინისტრო აღიარებს, რომ საგამოძიებო მოქმედებების ჩასატარებლად მოსამართლის განჩინებაში კლუბ ბასიანის ძველი საიდენტიფიკაციო კოდი ეწერა. უწყების განმარტებით, საფინანსო-საბუღალტრო დოკუმენტაციას ხარვეზის აღმოფხვრის შემდეგ ამოიღებენ.

განცხადებაში ნათქვამია, რომ 22 ივნისს შინაგან საქმეთა სამინისტროს წარმომადგენლებმა მიმართეს შპს ბასიანის ადმინისტრაციას მოსამართლის 24 მაისის განჩინებით (რომლის მოქმედების ვადაა 30 დღე) და განუმარტეს, რომ ამ განჩინების საფუძველზე უნდა განხორციელებულიყო საგამოძიებო მოქმედებები საფინანსო-საბუღალტრო დოკუმენტაციის ამოღების მიზნით.

ბასიანის დამფუძნებლის, ტატო გეთიას თქმით, არასწორი საიდენტიფიკაციო კოდის გამო ჩხრეკა უკანონოა.

ვიდეომასალაში, რომელსაც თეთრი ხმაურის მოძრაობა ავრცელებს, შინაგან საქმეთა სამინისტროს წარმომადგენელი არ უარყოფს გეთიას განცხადებას არასწორი საიდენტიფიკაციო კოდის შესახებ და აცხადებს, რომ კოდის გარდა განჩინებაში მისამართი და შპს-ს სახელი წერია და სწორედ იმ მისამართზე ახორციელებს ჩხრეკას.

შსს-ს წარმომადგენელმა მოუწოდა გეთიას, ჩხრეკის პროცესზე წარმომადგენლის სტატუსით დარჩენილიყო და საგამოძიებო მოქმედებისთვის ხელი არ შეეშალა.

სპეცოპერაციიდან 21 დღიანი ლუქის შემდეგ, ბასიანი 23 მაისს გაიხსნა. 11 მაისს გვიან ღამით შსს-მ სპეცოპერაცია ჩაატარა და ნარკორელიზატორობის ბრალდებით რვა პირი დააკავა. რამდენიმე საათში კი პოლიცია ბასიანში, კაფე გალერისა და ბლოუ-ბარში შევიდა, კლუბის სტუმრები გარეთ გაიყვანა და შენობების ჩხრეკა დაიწყო.

ბასიანთან და გალერისთან პოლიციელებს, სპეცრაზმელებსა და მოქალაქეებს შორის სიტყვიერი და ფიზიკური დაპირისპირება მოხდა. სამართადამცავების მოთხოვნის დაუმორჩილებლობისთვის 50-მდე პირი დააკავეს.

ბასიანსა და გალერიში სპეცოპერაციის და პოლიციის მხრიდან ძალის გამოყენების გასაპროტესტებლად თბილისში 2-დღის განმავლობაში აქცია #ჩვენითავისუფლებისთვის იმართებოდა.

აქცია მას შემდეგ დაიშალა, რაც შინაგან საქმეთა მინისტრმა, გიორგი გახარიამ ბოდიში მოიხადა და ნარკოპოლიტიკაზე სამუშაო ჯგუფის შექმნის პირობა დადო.