ცნობილ აზერბაიჯანელ აქტივისტ ვაფა ნაგს სახელისუფლებო მედია აქტიურად ესხმის თავს იმის გამო, რომ თბილისში გაეროს კლიმატის ცვლილების კონფერენციის (COP29) საწინააღმდეგო საპროტესტო აქციას დაესწრო.

გაეროს კლიმატის ცვლილებების კონფერენცია 11 ნოემბერს ბაქოში დაიწყო. ვაფა ნაგი ამ დროისათვის ქართველ და სომეხ აქტივისტებთან ერთად თბილისში ცნობილი შვედი ეკოაქტივისტის, გრეტა თუნბერგის მიერ ორგანიზებულ საპროტესტო აქციას ესწრებოდა.

თუნბერგმა კონფერენციას ბოიკოტი ადამიანის უფლებების კუთხით აზერბაიჯანში არსებული ვითარების გამო გამოუცხადა და ალიევის მთავრობას ბრალი დასდო მთიან ყარაბაღის რეგიონში სომხების ეთნიკურ წმენდაში.

თუნბერგმა ასევე ისაუბრა აზერბაიჯანის სახმელეთო საზღვრების ჩაკეტვაზე, რომელიც უკვე 4 წელია გრძელდება.

"აზერბაიჯანის მოსახლეობა გამომწყვდეულია. მათ არ შეუძლიათ ქვეყანაში შესვლა ან იქიდან გასვლა, თუ ამას აეროპორტის გზით არ იზამენ", — განაცხადა გრეტა თუნბერგმა.

პროტესტის აზერბაიჯანელ მონაწილეებს მოსალოდნელი სასჯელის შიშით სახეები დაფარული ჰქონდათ.

"[დემონსტრაციის] COP29-ის მიმდინარეობისას ჩატარების მიზანი კონფერენციაზე კავკასიის პრობლემებზე ყურადღების მიპყრობა იყო. პირველ რიგში, მან აჩვენა კავკასიელი ხალხების სოლიდარობა და ერთიანობა COP29-ის ავტორიტარულ ქვეყანაში ჩატარების წინააღმდეგ", — განუცხადა ვაფა ნაგმა OC-Media-ს.

ნაგმა, რომელიც წარსულში ქვეყანაში ერთ-ერთი იშვიათი ოპოზიციურად განწყობილი მუნიციპალური საკრებულოს წევრი იყო, 2024 წლის საპარლამენტო არჩევნებში მიიღო მონაწილეობა, თუმცა უშედეგოდ.

თბილისში გამართულ დემონსტრაციაში მონაწილეობის მიღების შემდეგ, აზერბაიჯანის სახელისუფლებო მედიამ ნაგის წინააღმდეგ კოორდინირებული კამპანია დაიწყო.

ტანზილა რუსტამხანლიმ, რომელმაც 2024 წელს ნაგის წინააღმდეგ იყარა კენჭი, პროსახელისუფლებო მედია იენი მუსავატთან საუბარში განაცხადა, რომ ნაგის მოქმედებები "ქვეყნისა და აზერბაიჯანელი ხალხის ღალატია" და მის წინააღმდეგ ღალატის მუხლით საქმეც უნდა აღიძრას.

"[ნაგი] წლების განმავლობაში მოქმედებდა აზერბაიჯანის წინააღმდეგ, ასრულებდა რა აზერბაიჯანის მიმართ მტრულად განწყობილი უცხოური ძალების ბრძანებებს. ანტიაზერბაიჯანელი აქტივისტები გააგრძელებენ ზრდას, თუ შესაბამისი სახელმწიფო ორგანოები არ მიიღებენ სამართლებრივ ზომებს მის წინააღმდეგ", — განაცხადა რუსტამხანლიმ.

ნაგმა განაცხადა, რომ მთავრობის სოცმედია ტროლების გაღიზიანება გამოიწვია პოსტერმა, რომელიც სომეხ აქტივისტს ეჭირა. პლაკატზე გამოსახული იყო მთიანი ყარაბაღის ეთნიკური წმენდა, რომლის ფარგლებშიც რეგიონი მთელმა სომხურმა მოსახლეობამ დატოვა.

"მიუხედავად იმისა, რომ ფოტოზე პოსტერი მე არ მიჭირავს, შეურაცხყოფას მაინც მე მაყენებენ, თუმცა მე სოციალურ მედიაში ღიად განვაცხადე, რომ, ჩემი აზრით, მთიანი ყარაბაღიდან სომხების გასვლა ეთნიკური წმენდა იყო", — განაცხადა ვაფა ნაგმა.

ნაგის წინააღმდეგ გაილაშქრა არამხოლოდ სამთავრობო მედიამ და მთავრობამ, არამედ ნატიგ ჯაფარლიმაც, ოპოზიციური პარტია REAL-ის ლიდერმა. ჯაფარლიმ გააკრიტიკა ნაგი და განაცხადა, რომ მთავრობამ მას საპარლამენტო კამპანიის წარმოების საშუალება მისცა, რათა "სიმბოლურ" ოპოზიციად წარმოეჩინა.

"უკანასკნელ არჩევნებზე, როცა ნეფტჩალაში "სიმბოლური გმირი" შექმნეს, ჩვენ ჩუმად ვიყავით და არ გამოგვიხატავს ჩვენი აზრი [...], როცა მთავრობა დაინტერესებული იყო ამ საკითხის განვითარებით", — განაცხადა ჯაფარლიმ.

კრიტიკის საპასუხოდ, ნაგმა განაცხადა, რომ მთავრობისათვის ჩვეული მეთოდია მისი სახელის "გაშავება" — ჯაფარლიც ამას მისი სახელის საზოგადოების თვალში დისკრედიტაციას, ცდილობს.

"აქციის ერთ-ერთი მთავარი სლოგანი იყო "გაერთიანებულ კავკასია არასდროს დამარცხდება". როგორც კავკასიელი ფემინისტები, ჩვენ ვფიქრობდით, რომ კავკასიელებს შეუძლიათ საკუთარი პრობლემების გადაჭრა. ადგილობრივი პრობლემები სოლიდარობაზეა დაფუძნებული, რადგან ეს ქვეყნები მჭიდროდ არიან დაკავშირებული — თუ რომელიმეს რამე ემართება, ეს აუცილებლად ახდენს გავლენას სხვებზე", — განაცხადა ვაფა ნაგმა.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.