პარლამენტთან მიმდინარე აქცია იშლება. ეს გადაწყვეტილება აქციის ორგანიზატორებმა შინაგან საქმეთა მინისტრის გიორგი გახარიას სიტყვით გამოსვლის შემდეგ მიიღეს. თეთრი ხმაურის მოძრაობის წარმომადგენლების თქმით, ისინი აქციებს შაბათამდე წყვეტენ და თუ ხელისუფლებასთან შეთანხმებას ვერ მიაღწევენ აქციები ისევ განახლდება.

გიორგი გახარიამ აქციის მონაწილეებს სიტყვით მიმართა და ბოდიში მოიხადა. მან განაცხადა, რომ 14 მაისს დილის 10 საათზე მათ წარმომადგენლებს შეხვდებოდა და ყველა საკითხს განიხილავდა მათთან ერთად.

მან აქციის მონაწილეებს მოუწოდა, რომ დაემორჩილონ პოლიციის მითითებებს და გაუფრთხილდნენ მოქალაქეების უსაფრთხოებას.

მინისტრმა კონტრაქციის მონაწილეებსაც მიმართა და მოუწოდა ერთად შეინარჩუნონ გამოხატვის მიღწევები, რომელიც ქვეყანას აქვს და არ შევიდნენ კონფლიქტში, რომელიც მხოლოდ დროს დააკარგვინებს მათ.

გახარია დემონსტრანტებთან მას შემდეგ გამოვიდა, რაც მანამდე თეთრი ხმაურის მოძრაობის ლიდერმა მინისტრის დაპირებები გააჟღერა. იქ შეკრებილებს, მათ შორის, ორგანიზატორების ნაწილს მინისტრის მიერ შემოთავაზებული პირობები მიუღებელი აღმოჩნდა და ისინი გახარიასგან ბოდიშის მოხდას ითხოვდნენ.