21 წლის მათე დევიძეს 19 ნოემბერს მელიქიშვილის გამზირზე გამართულ აქციაზე პოლიციელებზე თავდასხმას ედავებიან. აქციის ორგანიზატორები ითხოვენ, გაათავისუფლონ სასტიკად ნაცემი მათე დევიძე.

როგორც დაკავებულის ადვოკატმა, ბექა კვინიკაძემ განაცხადა, მისი დაცვის ქვეშ მყოფი დანაშაულის ჩადენის ფაქტს უარყოფს და აცხადებს, რომ ჯოხს მხოლოდ პოლიციელების შიშის გამო იქნევდა.

"მხნედ არის, საბრძოლო განწყობაზეა. მოტყუებით გაიყვანეს, უთხრეს გიშვებთო და იქვე გამომძიებლები დახვდნენ. 10 წუთიანი პროცედურაა აგიყვანთ და მალე ჩამოგიყვანთო, უთხრეს. მისთვის უფლებები არ განუმარტავთ. ჯოხის ქნევის ფაქტთან დაკავშირებით დაკითხეს. ამბობს, შემეშინდა და ვიქნევდი, არავისთვის ჩამირტყამს, მიზანი რომ ვინმესთვის ჩამერტყა და დაზიანება მიმეყენებინა, განზრახული არ მქონიაო", — აცხადებს კვინიკაძე.