საქართველოში თურქეთის ელჩმა, დღეს, თბილისში გამართულ პრესკონფერენციაზე ფეთულა გიულენის საკითხზეც ისაუბრა.

ელჩმა აღნიშნა, რომ გიულენის საკითხი ძაბავს ურთიერთობას თურქეთსა და ამერიკას შორის და ამერიკის პოზიცია ამ საკითხთან დაკავშირებით არასწორია:

"ამერიკა, როგორც ჩვენი მოკავშირე, გულს გვტკენს რომ მასპინძლობს გიულენს".

თუმცა, ელჩის თქმით, სიტუაციის გარკვევის შემდეგ მათ აქვთ იმედი, რომ ამერიკა მოიქცევა როგორც მოკავშირე ქვეყანა და გადასცემს გიულენს თურქეთის ხელისუფლებას:

"იმ პერიოდში მიმდინარე ყველა სამართლებრივმა პროცესმა დაგვარწმუნა, რომ ბრალდებები არ იყო უსაფუძვლო და გადატრიალების მცდელობის უკან იდგნენ ორგანიზაციები, სამართლებრივი პროცესი დასრულდება და გაიგებთ შედეგებს".

ელჩმა უპასუხა ჟურნალისტების კითხვებს გიულენის ორგანიზაციების დახურვის პროცესებთან დაკავშირებით, მათ შორის აზერბაიჯანში გიულენთან დაკავშირებული ყველა სასწავლო დაწესებულების დახურვაზე:

"სამწუხაროდ ჩვენ ვსაუბრობთ ორგანიზაციაზე, რომელმაც მოახერხა სხვადასხვა ადგილებში ხალხის ჩანერგვა, ამაზე ჩვენ ნათლად ვსაუბრობთ. რაც შეეხება ამ პრობლემის მოგვარებას საქართველოში, ჩვენ გვაქვს აქტიური კავშირი და მოლაპარაკებები ქართულ მხარესთან და ვმუშაობთ შეთანხმებულ რეჟიმში"

თურქეთში მომხდარ გადატრიალების მცდელობაში პრეზიდენტი ერდოღანი ამერიკაში მცხოვრებ ფეთულა გიულენს და მის ორგანიზაციას ადანაშაულებს. ერდოღანი მოითხოვს ამერიკამ გადასცეს გიულენი თურქეთს, რისთვისაც ამერიკა მეტ მტკიცებულებებს ითხოვს.