ქართული ოცნების დეპუტატის, საპარლამენტო უმრავლესობის ლიდერის არჩილ თალაკვაძის განცხადებით, ფინანსთა მინისტრი, მამუკა ბახტაძე, სხვებთან ერთად პრემიერ-მინისტრის პოსტზე განიხილება.

დეპუტატის თქმით, შიდა კონსულტაციების უკვე დაწყებულია და უმრავლესობის სხდომის დასრულების შემდეგ, პრემიერ-მინისტრობის კანდიდატზე განაცხადებენ.

"კანდიდატს უნდა ჰქონდეს ეკონომიკური განათლება და ეკონომიკის სფეროში მუშაობის გამოცდილება", - განმარტა არჩილ თალაკვაძემ.

მისი თქმით, ხელისუფლების მოლოდინი არის ის, რომ ახალ პრემიერს ექნება სამოქმედო გეგმა, რომელიც სიღარიბის პრობლემას მოაგვარებს.

მმართველი პარტიის, ქართული ოცნების ცენტრალურ ოფისში დღეს უმრავლესობის გაფართოებული სხდომა გაიმართება, სადაც პრემიერ-მინისტრობის კანდიდატზე იმსჯელებენ.

სხდომა პარტიის ოფისში 17:00 საათზე დაიწყება.

რა ხდება პრემიერ-მინისტრის გადადგომის შემდეგ

ქართული ოცნების მმართველობის პერიოდში მესამე პრემიერ-მინისტრმა გიორგი კვირიკაშვილმა გუშინ, 13 ივნისს პრემიერ-მინისტრის თანამდებობა დატოვა. საქართველოს კონსტიტუციის თანახმად, პრემიერის გადადგომასთან ერთად, მთავრობის შემადგენლობაც გადამდგარად ითვლება.

პრემიერ-მინისტრის გადადგომის შემდეგ, საქართველოს კონსტიტუციის მიხედვით, პრეზიდენტმა არსებულ მთავრობას დააკისრა ვალდებულება ახალი მთავრობის არჩევამდე თავისი მოვალეობა შეასრულოს. ამის შემდეგ, შვიდი დღის განმავლობაში, საპარლამენტო უმრავლესობამ პრეზიდენტს პრემიერ-მინისტრობის კანდიდატი უნდა შესთავაზოს, რომელსაც იგი უკვე პარლამენტს წარუდგენს განსახილველად. პრემიერ-მინისტრის კანდიდატი 14 ივნისს უმრავლესობის გაფართოებულ სხდომაზე გახდება ცნობილი.

ასევე შვიდდღიან ვადაში პრემიერ-მინისტრობის კანდიდატმა უნდა ჩამოაყალიბოს მთავრობის შემადგენლობა და პარლამენტს ნდობის მისაღებად უნდა წარუდგინოს. მან ასევე უნდა წარადგინოს სამთავრობო პროგრამაც.

ამის შემდეგ, კიდევ შვიდი დღის განმავლობაში, პარლამენტმა ეს ყველაფერი უნდა განიხილოს და კენჭი უყაროს. მაქსიმუმ 21 დღეში ახალი მთავრობა უნდა დაკომპლექტეს