ზაზა სარალიძის ადვოკატის თქმით, პრემიერთან და შს მინისტრთან შეხვედრამ მშვიდად ჩაიარა და არსებობს მზაობა მთავრობიდან, რომ საქმეს მიეცეს მსვლელობა. მისი თქმით, ელოდებიან რომ დააკავონ ყველა ის პირი, ვინც არამხოლოდ მკვლელობაში, არამედ საქმის გაყალბებასა და მტკიცებულებათა განადგურებაშიც მიიღო მონაწილეობა.

შეხვედრის შემდეგ ზაზა სარალიძემ განაცხადა, რომ თუ 10 ივნისამდე არ გადაიდგმება კონკრეტული ნაბიჯები დამნაშავეების დასაკავებლად, მისი დამოკიდებულება არ შეიცვლება. მისივე თქმით, აქციები 10 რიცხვამდეც გაგრძელდება.

ზაზა სარალიძე და მალხაზ მაჩალიკაშვილი ოჯახებთან, ომბუდსმენთან და ადვოკატებთან ერთად, პრემიერ-მინისტრ გიორგი კვირიკაშვილს, შინაგან საქმეთა მინისტრს, გიორგი გახარიას ხვდებოდნენ.

კვირიკაშვილთან შეხვედრის სურვილი გუშინ, 3 ივნისს ზაზა სარალიძემ გამოთქვა. რის შემდეგაც ოპოზიციის ლიდერმა, გიორგი ვაშაძემ განაცხადა, რომ შეხვედრას პარტიებიც დაესწრებოდნენ და შეხვედრის მიზანი იყო მთავრობის გადადგომა.

დღეს, 4 ივნისს პრემიერის პრესსამსახურმა განაცხადა, რომ კვირიკაშვილი ზაზა სარალიძეს და ლევან დადუნაშვილის ოჯახს, სახალხო დამცველთან ერთად, პოლიტიკური პარტიების გარეშე შეხვდებოდა.

მალხაზ მაჩალიკაშვილის განცხადებით, ის რომ პრემიერი მხოლოდ ხორავას ქუჩაზე მოკლულის მშობლებს შეხვდებოდა და მასთან შეხვედრა არ ისურვა დისკრიმინაციული მოტივებით იყო განპირობებული.

სარალიძემ განაცხადა, რომ პრემიერთან შეხვედრაზე მარტო არ შევიდოდა. მისი თქმით, შეხვედრას უნდა დასწრებოდა შვილმკვდარი მშობლებიც, საზოგადოებრივი ჯგუფებიც და პოლიტიკოსებიც. მისივე თქმით, მთავრობას ულტიმატუმებით ლაპარაკის უფლება არ ქონდა.