პრემიერთან და შს მინისტრთან შეხვედრის შემდეგ ზაზა სარალიძემ განაცხადა, რომ თუ 10 ივნისამდე არ გადაიდგმება კონკრეტული ნაბიჯები, იგივე პოზიციაზე რჩება და მოთხოვნები არ შეიცვლება. სარალიძის თქმით, პრემიერს თავის მოთხოვნებზე ესაუბრა:

"აბსოლუტურად ყველა პირი უნდა იყოს დაკავებული, ვინც იყო მკვლელი, ვინც დანაშაული ჩაიდინა, რომელმა გამომძიებელმა, პროკურორმაც დანაშაული ჩაიდინა, ვინც მფარველობდა ამ პროკურორებს."

სარალიძის თქმით, შეხვედრის შემდეგ ნდობა და გამოძიების მოლოდინი არ გაჩენია. მისივე თქმით, პრემიერმა უთხრა, რომ მის გადადგომას არსებითი მნიშვნელობა არ ჰქონდა. სარალიძის თქმით, აქციები არ შეწყდება და მოთხოვნა სისტემის დანგრევისა და მთავრობის გადადგომის შესახებ უცვლელია.

სარალიძის შეხვედრა მას შემდეგ დაიწყო, რაც მაჩალიკაშვილებთან შეხვედრა დასრულდა. სარალიძე ოჯახთან, ომბუდსმენთან და ადვოკატებთან ერთად ხვდებოდა პრემიერ-მინისტრ გიორგი კვირიკაშვილსა და შინაგან საქმეთა მინისტრს, გიორგი გახარიას.

კვირიკაშვილთან შეხვედრის სურვილი ზაზა სარალიძემ გუშინ, 3 ივნისს გამოთქვა. რის შემდეგაც ოპოზიციის ლიდერმა, გიორგი ვაშაძემ განაცხადა, რომ შეხვედრას პარტიებიც დაესწრებოდნენ და შეხვედრის მიზანი იყო მთავრობის გადადგომა.

დღეს, 4 ივნისს პრემიერის პრესსამსახურმა განაცხადა, რომ კვირიკაშვილი ზაზა სარალიძეს და ლევან დადუნაშვილის ოჯახს პოლიტიკური პარტიების გარეშე შეხვდებოდა. რაზეც მალხაზ მაჩალიკაშვილმა განაცხადა, რომ პრემიერმა მასთან შეხვედრა დისკრიმინაციული მოტივებით არ ისურვა.

სარალიძემ განაცხადა, რომ პრემიერთან შეხვედრაზე მარტო არ შევიდოდა. მისი თქმით, შეხვედრას უნდა დასწრებოდნენ შვილმკვდარი მშობლებიც, საზოგადოებრივი ჯგუფებიც და პოლიტიკოსებიც. მისივე თქმით, მთავრობას ულტიმატუმებით ლაპარაკის უფლება არ ქონდა.

მოგვიანებით, ადმინისტრაციამ შესთავაზა სარალიძეს და მაჩალიკაშვილს ოჯახებთან, ომბუდსმენთან და ადვოკატებთან ერთად შეხვედროდენ მინისტრებს, რასაც სარალიძე დათანხმდა.