დღეს დაგეგმილი გაფიცვა ჭიათურაში აღარ გაიმართება. საქართველოს პროფკავშირების გაერთიანების ინფორმაციით, ჯორჯიან მანგანეზის ადმინისტრაციამ და პროფკავშირის წარმომადგენლებმა შეთანხმებას მიაღწიეს და კომპანიამ მუშებს ანაზღაურება 10%-ით გაუზარდა. პროფკავშირების განცხადებით, მუშებს ხელფასი 2018 წლის პირველი ივნისიდან მოემატებათ.

"2019 წლის იანვრის თვიდან მოხდება ზეგანაკვეთურ საათებში და სადღესასწაულო დღეებში მუშაობის ანაზღაურების ტარიფის ზრდის, გარკვეულ სადღესასწაულო დღეებში ფულადი საჩუქრის დაწესების და სხვა სოციალური ბენეფიტების დაწესების შესაძლებლობა",- წერია პროფკავშირების გავრცელებულ განცხადებაში.

ჯორჯიან მანგანეზის განცხადებით, გამჭვირვალობისთვის, ცვლილების მიღების პროცესში პროფკავშირებისა და დასაქმებულების მაქსიმალურ ჩართვას უზრუნველყოფს. ამასთან, კომპანია იღებს ვალდებულებას, რომ გეგმის შესრულების ყოველდღიური კონტროლის ციფრული მექანიზმები შექმნას, რათა უზრუნველყოს დასაქმებულთა ვიზუალური ინფორმირება.

4 ივნისს 8 საათზე ჭიათურის პირველად პროფკავშირულ ორგანიზაციას სრულმასშტაბიანი გაფიცვა უნდა დაეწყო ხელფასების 30%-ით ზრდის მოთხოვნითა და იმ მიზეზით, რომ 2014 წლიდან ჭიათურაში მუშებს შრომითი ანაზღაურება არ გაზრდიათ.