აშშ-ს ვიცე პრეზიდენტმა ჯო ბაიდენმა თურქეთის პრემიერთან ბინალი ილდირიმთან სატლეფონო საუბრისას ხაზგასმით განაცხადა, რომ აშშ მზადაა ითანამშრომლოს თურქეთის ხელისუფლებასთან, სახელმწიფო გადატრიალების მცდელობის საქმის გამოძების პროცესში:

"ჩვენი ექსპერტები მზად არიან იმუშავონ თურქ კოლეგებთან ერთად".

თეთრი სახლი სატელეფონო საუბრის შინაარსის შესახებ განცხადებას აქვეყნებს.

ვიცე პრეზიდენტმა მოუწოდა თურქეთის მთავრობას, რომ გადატრიალების მცდელობაში ჩართული დამნაშავეების მიმართ გატარებული სამართლებრივი ზომებით, საზოგადოებაში დემოკრატიული ინსტიტუტებისა და კანონის უზენაესობის მიმართ ნდობა სწრაფად უნდა აღდგეს.

აშშ-მ თურქეთს კიდევ ერთხელ დაუდასტურა ორ ქვეყანას შორის სტრატეგიული ურთიერთობის მნიშვნელობის შესახებ. ჯო ბაიდენმა აშშ-ს სახელით კიდევ ერთხელ დაგმო გასულ კვირას მომხდარი წარუმატებელი სახელმწიფო გადატრიალების მცდელობა.

მან ასევე მტკიცე მხარდაჭერა გამოუთქვა თურქეთის დემოკრატიას და შეაქო თურქი ხალხის ერთგულება დემოკრატიული ინსტიტუტების მიმართ.

ასევე, მხარეებმა ექსტრემისტული დაჯგუფება ისლამური სახელმწიფოს წინააღმდეგ ბრძოლაში, საერთო თანამშრომლობის შესახებაც იმსჯელეს.