25 მაისს მოსკოვში, ტრეტიაკოვის გალერეაში ილია რეპინის XIX საუკუნის ნახატი "ივანე მრისხანე და მისი შვილი" (ასევე ცნობილი, როგორც "ივანე მრისხანე კლავს თავის შვილს") მეტალის პატარა ბოძით დააზიანეს. ტილო სამ ადგილას არის გახეული.

თავდამსხმელის წინააღმდეგ სისხლის სამართლის საქმეა აღძრული. თავდასხმისას კაცი ნასვამი იყო. როგორც თვითონ ახსნა, ნახატს იმის გამო დაესხა თავს, რომ ტილოზე დადასტურებული ფაქტები გამოსახული არაა (დღემდე არ არის დადასტურებული ნამდვილად მოკლა თუ არა ივანე მრისხანემ თავისი შვილი).

ოფიციალური ინფორმაციით, რესტავრაციის პირველი ეტაპის ღირებულება 5-10 მილიონი რუბლი (80-160 ათასი დოლარი) იქნება. გალერეაში დაბრუნების შემდეგ კი, ტილო ბრონირებული შუშის ქეისში ჩაისმება.

"ივანე მრისხანე კლავს შვილს" იყო პირველი ნახატი, რომელიც რუსეთის იმპერიაში დააცენზურეს, ჯერ კიდევ მე-19 საუკუნეში. დღემდე გარკვეული ჯგუფები ითხოვენ, რომ ნახატი ჩამოხსნან ტრეტიაკოვის გალერეიდან, რადგან "ის აღვივებს შუღლს რუსი ხალხის მიმართ და არ გამოხატავს ისტორიულ ფაქტებს".