კლუბ ბასიანის ერთ-ერთი დამფუძნებლის ზვიად გელბახიანის თქმით, მისთვის მნიშვნელობა არ აქვს სად ჩატარდება აქცია დახურულ თუ ღია სივრცეში, მთავარია, რომ სისტემასთან წინააღმდეგობა დაფიქსირდეს. ასე უპასუხა ზვიად გელბახიანმა On.ge-ს კითხვას, თუ რატომ გადმოინაცვლა საპროტესტო აქციამ რიყედან კლუბ ბასიანის შიდა ტერიტორიაზე.

ზვიად გელბახიანის თქმით, 12-13 მაისის სპეცოპერაციის შემდეგ, აქციების მონაწილეებს პატარ-პატარა გამარჯვებები სჭირდებოდათ.

"ეს რეივ-აქცია გაიმართა იმიტომ, რომ ეს გამარჯვება ვიზეიმოთ", - განმარტავს ზვიად გელბახიანი.

კითხვაზე, გაგრძელდება თუ არა აქციები პროტესტის სხვა მოთხოვნებთან დაკავშირებით, ზვიად გელბახიანი პასუხობს, რომ ამ საკითხზე აზრთა სხვადასხვაობაა.

"აქცია არ დაგვიანონსებია, რადგან მოთხოვნების ნაწილზე იყო გარკვეული აზრთა სხვადასხვაობა. მთავარი მოთხოვნა, რომ ბასიანი დაგვებრუნებინა დაკმაყოფილებულია, დანარჩენ მოთხოვნებში აზრთა სხვადასხვაობაა და თუ შევჯერდებით, შევუერთდებით", - განუცხადა On.ge-ს ზვიად გელბახიანმა.

კლუბ BASSIANI-ში საპროტესტო რეივ-აქცია დაიწყო. აქციაზე მისული სტუმრები უკვე შევიდნენ კლუბის ტერიტორიაზე. კლუბის წარმომადგენლებმა მედიას კლუბის შიგნით, მხოლოდ სამი წუთის განმავლობაში გადაღების უფლება მისცეს და შემდეგ ტერიტორია დაატოვებინეს.

აქციის ორგანიზატორების თქმით, კლუბის კარი ღიაა საზოგადოებრივი ჯგუფებისთვის, ყველა ადამიანისთვის ვინც მზადაა ერთად დადგეს საერთო გამოწვევებისა და პრობლემების წინააღმდეგ, მათ შორის პოლიტიკოსებისთვისაც.

გაიგეთ მეტი ბასიანში ჩატარებული სპეცოპერაციისა და მიმდინარე მოვლენების შესახებ.