ბრიტანული ვირტუალური ჯგუფ Gorillaz-ს თანადამაარსებელმა დეიმონ ოლბარნმა დიდი პანიკა გამოიწვია, როცა აღმოაჩინა, რომ ლონდონის ტაქსიში ის ლეპტოპი დარჩა, რომელშიც Gorillaz-ის ჯერ არ გამოსული ალბობის ასლი და სხვა მნიშვნელოვანი ინფორმაცია ჰქონდა შენახული.

დეიმონი ასევე ალტერნატიული როკ-ჯგუფ Blur-ის წამყვანი ვოკალისტია. ის ლონდონის კლუბ Groucho-ში დასალევად მიდიოდა, როდესაც ლეპტოპი ტაქსის უკანა სავარძელზე დატოვა.

"საშინელი სიტუაცია შეიქმნა, რომელიც უბრალოდ Gorillaz-ის აუდიო მასალებს არ ეხებოდა, მის ლეპტოპში ინახებოდა სხვა ძვირადღირებული ვიზუალები და ინფორმაციები. თითქმის შეუფასებელი იყო, ის ინფორმაცია, რაც მას ლეპტოპში ჰქონდა. თუმცა ის შემთხვევით ტაქსიში დარჩა და დიდი პანიკა გამოიწვია", - უთხრა წყარომ Mirror-ს.

როგორც ცნობილია, ვირტუალური ჯგუფის ახალი ალბომის მთავარი ინსპირაცია ოლბარნის ანტიბრექსიტული შეხედულებებია. ალბომი ივნისში გამოდის.

საბედნიეროდ, კრიზისი ტაქსის მძღოლმა დიდსულოვნად გადაჭრა, როდესაც დეიმონს თავისი ლეპტოპი უკან გადასცა.

2018 წელს, BRIT Awards-ზე, წლის საუკეთესო ბრიტანულ ჯგუფად Gorillaz დასახელდა. ჯილდოს მიღებისას, დეიმონ ოლბარნმა პოლიტიკური განცხადება გააკეთა:

"ერთი რამის თქმა მინდა და ეს ჩვენს ქვეყანას ეხება. დიდი ბრიტანეთი, გჯერათ თუ არა, პატარა ქვეყანაა. თუმცა ეს უსაყვარლესი ადგილია და ლამაზი სამყაროს ნაწილი. ნუ მოაქცევთ მას იზოლაციაში. ნუ გახდებით განცალკევებულნი. ჩვენი ზომის გათვალისწინებით, მუსიკაში უამრავი საოცრება მოვახდინეთ. ჩვენი სული ნამდვილია. ნუ მისცემთ პოლიტიკას იმის უფლებას, რომ ეს წაგართვათ".

Gorillaz-მა თავისი ბოლო, მეხუთე, სტუდიური ალბომი, Humanz, 2017 წლის 28 აპრილს გამოუშვა.