განახლება: On.ge-ს 10:26 საათზე შინაგან საქმეთა სამინისტროს პრესსამსახურში განუცხადეს, რომ სამივე მათგანი თავისუფალია.

პარლამენტის შენობასთან პოლიციამ აქციის სამი მონაწილე დააკავა. ამის შესახებ ადგილიდან On.ge-ს ჟურნალისტი იუწყება.

მისი ინფორმაციით, სამივე მათგანს შორის ჯერ სიტყვიერი, შემდეგ კი ფიზიკური დაპირისპირება მოხდა. პოლიციამ ერთ-ერთ დაკავებულს უთხრა, რომ მას ადმინისტრაციულ სამართალდარღვევათა კოდექსის 166-ე მუხლით აკავებდა. ამ მუხლით წვრილმანი ხულიგნობისთვის ჯარიმა, ან ადმინისტრაციული პატიმრობაა გათვალისწინებული.

აქციის ერთ-ერთი სხვა მონაწილე ამბობს, რომ დაკავებულები აქციის მონაწილეები არ იყვნენ. მისი განმარტებით ეს იყო პროვოკაცია.

ადევნეთ თვლი On.ge-ს პირდაპირ ეთერს.

საპროტესტო აქციები თბილისში მას შემდეგ დაიწყო, რაც 12 მაისს ღამეს კლუბ ბასიანსა და კაფე გალერიში სპეცოპერაცია ჩატარდა. ოფიციალური განცხადებით, ძალოვანებმა ნარკორელიზების ბრალდებით რვა პირი დააკავეს. სპეცოპერაცია დაპირისპირებებისა და მოქალაქეების დაკავების ფონზე მიმდინარეობდა.