InSight, იგივე ნასას ახალი როვერი წითელი პლანეტისკენ მიემართება და იქამდე ჩასვლას 6 თვეს მოანდომებს.

InSight-ის მატარებელი რაკეტა Atlas 5 შაბათს აფრინდა კალიფორნიის ვანდერბერგის საჰაერო ძალების ბაზიდან და მისი ხილვა ლოს-ანჯელესისა და სან-დიეგოს მაცხოვრებლებს შეუიარაღებელი თვალითაც შეეძლოთ.

კოსმოსური ხომალდის მიზანია, შეისწავლოს ჩვენი მზის სისტემის ადრეული პერიოდის აგებულება და მასში მიმდინარე პროცესები. ამ გაშვებამ ასევე შესაძლოა მოგვცეს ინფორმაცია იმის შესახებ, თუ როგორ იქმნება პლანტები შორეულ სისტემებში და რამდენად შესაძლებელია, რომ ამ შორეულ პლანტებზე სიცოცხლის არსებობისათვის საჭირო კლიმატი და გარემო არსებობდეს. InSight-ის მუშაობის პრინციპს ბევრი რამ აქვს საერთო ექოსკოპასთან. როგორც ხმოვან ტალღებს შეუძლიათ დედის მუცელში არსებული ჩვილის ფორმის გამოკვეთა, ასევე შეუძლია მარსის სეისმურ აქტივობას მისი ბირთვის ზომის, ქერქის სისქესა და მანტიის შემადგენლობაზე ინფორმაციის მოცემა.

მარსზე აქამდე გაშვებული ხომალდებისგან განსხვავებით, InSight ერთ კონკრეტულ ადგილას დაჯდება და ინფორმაციას იქიდან მოგვაწვდის. ინფორმაციის მოპოვებისათვის InSight-ის არსენალში არსებული ყველაზე საჭირო ინსტრუმენტებია - 4.5 მეტრიანი ბურღი, რომელიც წითელი პლანეტის ზედაპირს გახვრეტს და მოიპოვებს ინფორმაციას იმის შესახებ, თუ რა ტემპერატურაა პლანეტის შიგნით და სეისმოგრაფი, რომელიც ეცდება პლანეტაზე მეტეორების დაცემით გამოწვეული ვიბრაციებისა და იქაური "მიწისძვრების" დაფიქსირებას. იმედია, ეს ინფორმაცია გაგვიღრმავებს ცოდნას მარსის აგებულების შესახებ.

თუ მილიონობით კილომეტრის დაფარვის შემდეგ ყველაფერი ისევ მწყობრში იყო, ამ წლის 26 ნოემბერს InSight მარსის ეკვატორთან ახლოს დაეშვება.