თეთრი ხმაურის მოძრაობა გირჩის წევრების იაგო ხვიჩიასა და ვახო მეგრელიშვილის ადმინისტრაციული წესით, 10 დღით თავისუფლების აღკვეთას, ხოლო ზურა ჯაფარიძის 2000 ლარით დაჯარიმებას განცხადებით ეხმაურება.

თეთრი ხმაურის მოძრაობის პოზიციით, მომხდარი ფაქტი ნათლად აჩვენებს ერთის მხრივ საპოლიციო სისტემის შეუვალობას და მათ ხელთ არსებულ ძალადობრივ ბერკეტებს, ხოლო მეორეს მხრივ საზოგადოების სრულ დაუცველობას პოლიციური მარწუხებისგან.

"ჩვენ ვცხოვრობთ ქვეყანაში, სადაც სამართალდამცავთა თავგასულ ქმედებებზე მოქალაქეთა სამართლიანი პროტესტი ხულიგნობად და პოლიციისთვის წინააღმდეგობის გაწევად იფუთება, ხოლო სასამართლო ავტომატურ რეჟიმში იზიარებს ბრალდებებს, მიუხედავად იმისა არსებობს თუ არა კონკრეტულ საქმეებში ბრალდების დამადასტურებებლი ლეგიტიმური საფუძვლები", - ნათქვამია განცხადებაში.

თეთრი ხმაურის მოძრაობა წერს, რომ გირჩი არ არის პირველი შეთხვევა ხოლო ამგვარი ფაქტების სიმრავლე და სასამართლოს მხრიდან პოლიციის მუდმივი მხარდაჭერა, "მხოლოდ და მხოლოდ ახალისებს თანამშრომელთა თავგასულობას და კარს უხსნის მათ უკანონო ქმედებებისკენ".

"საპირწონედ, მოქალაქეები ძირითადად დაუცველნი ვრჩებით პოლიციური სისასტიკის პირისპირ. როდესაც ამგვარი ძალმომრეობის პოლიტიკა დაუბრკოლებლად ხორციელდება პირების მიმართ, რომელთაც გააჩნიათ საინფორმაციო თუ სამართლებრივი ბრძოლის წარმოების შესაძლებლობები, პოლიციური სისასტიკე კიდევ უფრო მწვავე და ფატალურ ფორმებს იღებს მინიმალური დაცულობის გარანტიების არ მქონე მოქალაქეებთან", - ამბობს თეთრი ხმაურის მოძრაობა ფეისბუქგანცხადებაში, აღნიშნულის დასტურად კი დემურ სტურუას საქმე მოჰყავს

მოძრაობა წერს, რომ მინისტრების ცვლილების მიუხედავად პოლიციური სისტემა უცვლელად ინარჩუნებს საკუთარ მოქალაქეებზე მოძალადე ინსტიტუტის სახეს.