ილონ მასკი Tesla-ს მმართველი, მსოფლიოს უმსხვილესი ონლაინ გადახდების ქსელის, PayPal-ის თანადამფუძნებელი და SpaceX-ის მფლობელი ამერიკელი ბიზნესმენია.
ალბათ უკვე მიხვდით, რომ მისი სამუშაო გრაფიკი საკმაოდ გადატვირთულია. მით უმეტეს ახლა, როდესაც მასკი საკუთარი ელექტრონული მანქანის ახალ მოდელზე თავდაუზოგავად მუშაობს.

გაინტერესებთ, როგორ ახერხებს გამომგონებელი ამდენი მნიშვნელოვანი და ამბიციური პროექტის წარმატებით განხორციელებას? გაითვალისწინეთ მისი რჩევები, რომლებიც დროის დაზოგვაში დაგეხმარებათ.

1. ბოლო მოუღეთ დიდ და ხანგრძლივ შეხვედრებს

ხანგრძლივი შეხვედრები თქვენს ყოველდღიურ საქმიანობას აფერხებს და ძვირფას დროს გაკარგვინებთ. უმჯობესია, ხალხმრავალ შეხვედრებს თავი აარიდოთ, თუ დარწმუნებული არ ხართ, რომ თქვენი დასწრება ყველა მონაწილეს გაუმარტივებს საქმეს. თუ საჭირო ხართ, ეცადეთ, მხოლოდ მთავარ საკითხზე კონცენტრირდეთ.

2. ხშირი შეხვედრები ასევე საზიანოა

ხშირ შეხვედრებს ერთადერთი გამართლება შეიძლება ჰქონდეს, როცა საკითხი სასწრაფოდაა გადასაჭრელი. როგორც კი პროექტი ამოიწურება, მაშინვე დაუბრუნდით ჩვეულებრივ რეჟიმს შეხვედრების გარეშე.

3. დატოვეთ შეხვედრა, თუ თქვენთვის ის უინტერესოა

თუ იმყოფებით შეხვედრაზე, რომელიც კონკრეტულად თქვენთვის უინტერესო და არაფრისმომცემია, ნუ მოგერიდებათ, უბრალოდ ადექით და გადით.

4. ნუ გამოიყენებთ არაფრისმთქმელ ტერმინებს

სამსახურეობრივ სიტუაციებში ხშირად ვხვდებით პროფესიულ ჟარგონს, აბრევიატურებსა და შემოკლებებს. Tesla-ში პროცესებისა თუ პროექტებისთვის სახელის მინიჭება ასე არ ხდება. "ზოგადად რომ ვთქვათ, ყველაფერი, რასაც დამატებითი განმარტება სჭირდება, პროცესებს აფერხებს. ჩვენ არ გვინდა, რომ ახალ თანამშრომლებს ლექსიკონის დამახსოვრება უწევდეთ", - ამბობს მასკი.

5. ნუ დაემორჩილებით იერარქიას

თანამშრომლებთან კომუნიკაცია უნდა ხდებოდეს არა შუამავალი რგოლების დახმარებით, არამედ უმოკლესი და პირდაპირი გზით. ნებისმიერი მენეჯერი, რომელიც ცდილობს, კომუნიკაციის მიმართულება გაამრუდოს, სულ მალე უსამსახუროდ დარჩება.

6. მიჰყევით ლოგიკას და არა წესებს

მაშინ, როდესაც კონკრეტული პრობლემის გადასაჭრელად კომპანიაში არსებული წესები არ ამართლებს, უმჯობესია, ლოგიკას მიჰყვეთ. თუ კომპანიის წესი რომელიმე სიტუაციაში სასაცილოდ გეჩვენებათ, ესე იგი, წესი შესაცვლელია.