ორდღიანი მსვლელობის შემდეგ აგარის ქარხნის თანამშრომლები თბილისში, ჩამოვიდნენ. ისინი მთავრობის კანცელარიისკენ მიემართებიან. 3 საათზე კანცელარიასთან აქცია გაიმართება. ფეხით ჩამოსულ აქციის მონაწილეებს აგარიდან ჩამოსული სხვა მოქალაქეები შეუერთდებიან. 6- თვიანი იძულებითი მოცდენის შემდეგ, ისინი ქარხნის ამუშავებას და საკითხში მთავრობის ჩართულობას მოითხოვენ.

"დასაქმების ალტერნატივა არ გვაქვს. მხოლოდ და მხოლოდ ეს ქარხანაა. მთელი დაბა დამოკიდებულია ამ ქარხანაზე. ქარხნის დახურვის შემდეგ დახმარება არ მიგვიღია, ორი თვის კომპენსაცია მოგვცეს და მეტი არაფერი", - უთხრა On.ge-ს აქციის მონაწილემ.

აქციის მონაწილეების თქმით, საზღვარგარეთიდან იაფასიანი უხარისხო შაქარი შემოაქვთ და მათთვის არგუმენტი, რომ აგარის შაქარი სხვა შაქრებს კონკურენციას ვერ უწევს მიუღებელია.

აქციის მონაწილეები სკანდირებენ - აამუშავე აგარა.

თბილისში ჩამოსვლამდე აქციის მონაწილეებმა ფეხით 110 კილომეტრი დაფარეს. მსვლელობის დროს ორი პირი ცუდად გახდა. მიუხედავად ჯანმრთელობის მდგომარეობისა, მათ უარი თქვეს სახლში დაბრუნებაზე და მსვლელობა გააგრძელეს.

აგარაში შაქრის ქარხნის დახურვას ადგილობრივები ორი თვის განმავლობაში აპროტესტებდნენ.

გუშინ, 19 აპრილს, აგარის შაქრის ქარხნის, ტყიბულის შახტის და ჭიათურის მაღაროს საკითხებზე ჯანდაცვის სამინისტროში სოციალური პარტნიორობის სამმხრივი კომისია გაიმართა. სხდომის გამართვა, მას შემდეგ გადაწყდა, რაც საქართველოს პროფკავშირებმა კომისიას განცხადებით მიმართეს.