რუსთავი 2-ის გენერალური დირექტორის ნიკა გვარამიას განცხადებით, ტელეკომპანიამ სტრასბურგიდან საქართველოს სახელმწიფოს პასუხი მიიღო.

წერილის მიხედვით, რუსთავი 2-ის მოპასუხე სტრასბურგის სასამართლოში საქმის განხილვის დასრულებამდე ტელეკომპანიის ქიბარ ხალვაშისთვის გადაცემას მოითხოვს.

ნიკა გვარამიას ფეისბუქსტატუსზე დაყრდნობით, საქართველოს მთავრობის პოზიციაში საუბარია, რომ რუსთავი 2 ლახავს სასამართლოს იმიჯს და სიცრუეს ავრცელებს.

On.ge დამატებითი ინფორმაციის მიღების მიზნით, რუსთავი 2-ის ადვოკატს თამთა მურადაშვილს დაუკავშირდა. მისი თქმით, რუსთავი 2-ის საქმეზე თავისი პოზიცია მთავრობამ სტრასბურგს უკვე გადაუგზავნა.

"ჩვენ დღეს მივიღეთ პასუხი და ვეცნობით მიღებულ ინფორმაციას, ერთი იმის თქმა შეგვიძლია, რომ მთავრობამ სტრასბურგის სასამართლოს მიერ დადგენილი დროებითი ღონისძიების გაუქმება და რუსთავი 2-ის ქიბარ ხალვაშისთვის დაბრუნება მოითხოვა", - განმარტა თამთა მურადაშვილმა.

On.ge დამატებითი ინფორმაციის მიღებას იუსტიციის სამინისტროში ცდილობს.

ადამიანის უფლებათა ევროპულმა სასამართლომ, 7 მარტს, საქართველოს უზენაესი სასამართლოს გადაწყვეტილების აღსრულება, რუსთავი 2-ის საქმეზე, უვადოდ, იმ დრომდე შეაჩერა, სანამ საბოლოო გადაწყვეტილებას არ მიიღებს.

საქართველოს უზენაესი სასამართლოს დიდი პალატის 2 მარტის გადაწყვეტილებით, ტელეკომპანია რუსთავი 2 მისი ყოფილი მფლობელის, ქიბარ ხალვაშისა და მისი კომპანიის, შპს პანორამას საკუთრება გახდა.

ხალვაშმა სასამართლო დავა 2015 წლის აგვისტოში დაიწყო. ტელეკომპანიის ირგვლივ მიმდინარე საქმეები საქართველოში არსებულმა ყველა ინსტანციის სასამართლომ განიხილა, თუმცა, გადაწყვეტილება ყველა შემთხვევაში უცვლელი დარჩა.

რუსთავი 2-მა ადამიანის უფლებათა ევროპულ სასამართლოს მიმართა, რომელმაც ტელეკომპანიის სასარგებლო გადაწყვეტილება მიიღო.

ამავე თემაზე: რუსთავი 2-ის საქმე - დეტალები მოკლედ