შინაგან საქმეთა მინისტრის, გიორგი გახარიას ინფორმაციით, ბოლო წლებში შეწყალების აქტით განთავისუფლებულ მსჯავრდებულთა განმეორებითი დანაშაულის მაჩვენებელი ძალიან მაღალია.

გახარია 13 აპრილს, ბარნოვის ქუჩაზე მომხდარ მკვლელობაზე განმარტავს, რომ სამართალდამცავ უწყებაში შემაკავებელი ორდერი მნიშვნელოვანი ინსტრუმენტია. მისივე თქმით, იმ მომენტში პოლიციელებმა მიიღეს ისეთი ინფორმაცია, რაც მხოლოდ შემაკავებელი ორდერის გამოწერის საშუალებას იძლეოდა:

"ჩვენი მხრიდან პასუხისმგებლობების პერსონალიზირებას ადგილი არ ჰქონია. არსებობს მართლმსაჯულების ერთიანი სისტემის პრობლემები".

17 აპრილს განსაკუთრებული სისასტიკით ჩადენილი მკვლელობისა და დანაშაულის შეუტყობინებლობისთვის ბრალდებულ ორ პირს თბილისის საქალაქო სასამართლომ, აღკვეთის ღონისძიების სახედ, პატიმრობა შეუფარდა.

13 აპრილს თბილისში, ბარნოვის ქუჩაზე 25 წლის გოგოს შვილების თანდასწრებით ყელი გამოჭრეს. ის ადგილზევე გარდაიცვალა.

გამოძიების ინფორმაციით, მკვლელობამდე რამდენიმე საათით ადრე, მოკლული და დედამისი პოლიციის განყოფილებაში გამოცხადდნენ და დედის მიმართ შემაკავებელი ორდერის გამოწერა ითხოვეს. პოლიციამ პრდერი გამოწერა. პოლიციაში შვილის მკვლელობის შესახებ შეტყობინება დედის მიმართ ორდერის გამოწერიდან მალევე შევიდა.