უნგრეთში მიმდინარე საპარლამენტო არჩევნებში მმართველი მემარჯვენე-პოპულისტური კოალიცია იმარჯვებს. კოალიცია მოქმედი პრემიერ-მინისტრის, ვიქტორ ორბანის პარტია ფიდესითა და ქრისტიან-დემოკრატიული მოძრაობითაა დაკომპლექტებული. ამ დროის მონაცემებით, 8 აპრილს ჩატარებული არჩევნების ხმების 93 პროცენტი დათვლილია.

ამ დროის მონაცემებით, უნგრეთის ცენტრალური საარჩევნო კომიტეტის მონაცემებით ფიდესმა ხმათა 48 პროცენტი მიიღო. არჩევნების შედეგად, მმართველი კოალიცია კონსტიტუციურ უმრავლესობას მიიღებს - 199 მანდატიდან 133-ს. ხმათა 20 პროცენტით მეორე ადგილზე გავიდა მემარჯვენე-პოპულისტური პარტია იობიკი.

ორბანის პარტიის ისტორია

ორბანის პარტია - ფიდესი 80-იან წლებში კომუნისტური წყობის ოპოზიციურ პარტიად დაარსდა. დაარსებისთვის პარტია ლიბერალური პოლიტიკური ძალა იყო, თუმცა 2000-იანი წლების დასაწყისიდან დღემდე მემარჯვენე პოპულისტურ ძალად გარდაიქმნა.

პრემიერ-მინისტრად ორბანი პირველად 1998 წელს დაინიშნა. შემდეგ არჩევნებზე მისმა პარტიამ უმრავლესობა ვერ მოიპოვა და 2002 წელს მან პრემიერ მინისტრის თანამდებობა დატოვა. ქვეყნის მთავარ პოლიტიკურ თანამდებობაზე ორბანი 2010 წელს დაბრუნდა. წლევანდელი გამარჯვება ორბანისთვის მეოთხე წარმატებად იქცა, ის მესამე ვადით იქნება პრემიერი.

სოციალისტური ბანაკის ჩამოშლისა და უნგრეთში კომუნიზმის დამხობის შემდეგ ორბანი უნგრეთის ყველაზე გრძელვადიანი მმართველია.

კრიტიკა მოქმედი პრემიერის მიმართ

ბოლო წლების განმავლობაში, ორბანის საგარეო და საშინაო პოლიტიკა ხშირად ხდებოდა დასავლური დემოკრატიების და ევროკავშირის მხრიდან კრიტიკის საგანი. ამ პერიოდში მნიშვნელოვანი რეგულაციები და შეზღუდვები დაწესდა დამოუკიდებელ მედიაზე, უნგრეთში მომუშავე არასამთავრობო ორგანიზაციებზე, ეროვნულ ბანკსა და საკონსტიტუციო სასამართლოზე. ასევე, დაიხურა ჯორჯ სოროსის მიერ დაარსებული და დაფინანსებული ევროპის ცენტრალური უნივერსიტეტი ბუდაპეშტში.

წინააღმდეგობრივი საკითხები

წინააღმდეგობის ყველაზე მწვავე საკითხი ევროკავშირთან მიგრანტების თემა იქცა. მიუხედავად იმისა, რომ უნგრეთი ევროკავშირის ქვეყნების შორის ბოლოდან მესამე ადგილზეა მიგრანტების რაოდენობით, ორბანი მიგრაციის აქტიური მოწინააღმდეგეა. ბოლო წლებში უნგრეთის, ხორვატიისა და სერბეთის საზღვარზე აშენდა სპეციალური ჯებირები, რათა შეეჩერებინათ მიგრანტების ნაკადი. ორბანს ევროკავშირს პოლიტიკურ წრეებში ხშირად დიქტატორადაც მოიხსენიებენ.

ორბანი მილოცვებს იღებს

არჩევნებში გამარჯვება ორბანს უკვე მიულოცა, ჩეხეთის პრემიერმა, ანდრეი ბაბიშმა. ორბანს წარმატებები უსურვა პოლონეთის პრემიერმაც, მატეუშ მორავიეცკიმ. ევროკავშირის სხვა სახელმწიფოების ლიდერები ორბანისთვის მილოცვას არ ჩქარობენ. მიმლოცველებს შორისაა საქართველოს პრემიერი, გიორგი კვირიკაშვილი.