სანტა მონიკაში გამართული სამკვირიანი პროცესის შედეგად, ნაფიცმა მსაჯულებმა ვერდიქტში დაადგინეს, რომ რეპერი სოულჯა ბოი პასუხისმგებელია ყოფილ ასისტენტზე სექსუალურ და ფიზიკურ ძალადობაზე, ასევე ემოციური ტანჯვის მიყენებაზე. სასამართლომ რეპერს მოსარჩელე ქალისთვის 4 მილიონ დოლარზე მეტი ანაზღაურება დააკისრა.

34 წლის სოულჯა ბოი, რომლის ნამდვილი სახელია დეანდრე კორტეზ უეი, სასამართლომ დამნაშავედ ცნო ძალადობაში, სექსუალურ ძალადობასა და განზრახ ემოციური ზიანის მიყენებაში. თუმცა იგი უდანაშაულოდ სცნეს უკანონო დატყვევებასა და სხვა ბრალდებებში. ნაფიცმა მსაჯულებმა დაასკვნეს, რომ დაზარალებულს კომპენსაციის სახით დაახლოებით 4 მილიონი დოლარი, ხოლო მიყენებული ზიანის ანაზღაურებისთვის, დამატებით 250,000 დოლარი ეკუთვნის.

„დღევანდელი განაჩენი იმ სამართლიანობის მხოლოდ დასაწყისია, რაც ეკუთვნით სოულჯა ბოის და ზოგადად მუსიკალური ინდუსტრიის მსხვერპლებს,“ — თქვა მოსარჩელის ადვოკატმა ნეამა რაჰმანიმ.

სოულჯა ბოის ადვოკატის თქმით, წარდმოდგენილი მტკიცებულებები ამ ვერდიქტისთვის არასაკმარისი იყო და სასამართლო პროცესი კულტურული სტერეოტიპების გავლენის ქვეშ მოექცა. დაცვის მხარე ვერდიქტის გასაჩივრებას აპირებს.

ქალმა, რომლის ვინაობა საჯაროდ არ გახმოვანებულა, სარჩელი 2021 წელს შეიტანა.

სარჩელის მიხედვით, ქალმა სოულჯა ბოისთან მუშაობა 2018 წელს დაიწყო და მას სახლის დალაგებისთვის, სადილის მომზადებისთვის და სხვა პირადი დავალებების შესრულებისთვის, კვირაში 500 დოლარი უნდა მიეღო — თუმცა, ანაზღაურება არასდროს მიუღია.

ხოლო მისი თქმით, რეპერთან რომანტიკული ურთიერთობის დაწყებას მოჰყვა მასზე ფიზიკური და სექსუალური ძალადობა, სიტყვიერი შეურაცხყოფა და მოკვლის მუქარა.

სარჩელში აღნიშნულია, რომ სოულჯა ბოი მასზე შეყვარებულ ქალზე ემოციურად მანიპულირებდა, რის გამოც, მრავალჯერადი ძალადობის მიუხედავად, ორი წლის განმავლობაში, ქალმა რეპერისგან თავის დაღწევა ვერ შეძლო.

2020 წელს, როდესაც ქალი მას დაშორდა და ბინაში თავისი ნივთების წამოსაღებად დაბრუნდა, ის კვლავ ცემეს და გააუპატიურეს — წერია სარჩელში.

სოულჯა ბოი, ჰიპ-ჰოპ არტისტია ჩიკაგოდან, ყველაზე მეტად ცნობილია თავისი 2007 წლის ჰიტით “Crank That (Soulja Boy)”, რომელიც Billboard Hot 100-ის პირველ ადგილზე გავიდა და გრემის ნომინაციაც მოუტანა „საუკეთესო რეპ სიმღერის“ კატეგორიაში.

2019 წელს სოულჯა ბოის ძალადობისა და გატაცების გამო ყოფილმა შეყვარებულმაც უჩივლა. 2023 წელს სასამართლომ რეპერი პასუხისმგებლად ცნო ჩადენილ დანაშაულზე და ყოფილი შეყვარებულისთვის 471,800 დოლარის ანაზღაურება დააკისრა.