ცნობილია იმ ქალის ვინაობა, რომელმაც Youtube-ის სათავო ოფისში ცეცხლი გახსნა და სამი ადამიანი დაჭრა. BBC-ის ცნობით, ის 39 წლის ნასიმ აღდამია. პოლიციელები თავდასხმის მოტივს ამ დრომდე იძიებენ.

პოლიციის განცხადებით, ქალი, რომელიც სან-ბრუნოში, იუთუბის სათავო ოფისში შეიჭრა, საკუთარი თავისთვის მიყენებული ჭრილობებით გარდაიცვალა.

ნასიმ აღდამი კალიფორნიის შტატში სან-დიეგოში ცხოვრობდა. ამერიკული მედიის ცნობით, მას ჰქონდა არხი და ვებსაიტი, სადაც სხვადასხვა სახის ვიდეოებს ტვირთავდა, მათ შორის იყო ცხოველების მიმართ არასათანადო მოპყრობის თემა.

ის ვეგეტარიანელი ბოდიბილდერი, ხელოვანი და რეპერი იყო. მის არხს, რომელიც ახლა წაშლილია, დაახლოებით 5 000 გამომწერი ჰყავდა.

2017 წლის იანვარში მან ვიდეო გამოაქვეყნა, სადაც ამბობდა, რომ Youtube მის ვიდეოებს შლიდა.

"ზრდის პერსპექტივა Youtube-ზე და სხვა ვიდეოსაიტებზე შეუძლებელია, თუ მათ ეს არ უნდათ", - წერდა ის.

აღდამის მამის, ისმაილის თქმით, ის გაბრაზებული იყო, რადგან Youtube ვიდეოებში ფულს აღარ იხდიდა.

მამა ამბობს, რომ აღდამის კომპანიაში მისვლის მიზანი, შესაძლებელია, კომპანიის მიმართ მისი სიძულვილი ყოფილიყო.

Youtube-მა თავდასხმის შემდეგ, ნასიმ აღდამის არხი წაშალა.

CNN სამართალდამცავებზე დაყრდნობით წერს, რომ სავარაუდო თავდამსხმელი დაჭრილებიდან ერთ-ერთს იცნობდა. 3 ადამიანი საავადმყოფოშია გადაყვანილი.

შენობაში სროლის შესახებ, თავდაპირველად, იუთუბის თანამშრომლებმა ტვიტერზე დაწერეს. პოლიციამ ადგილზე მისვლის შემდეგ, ცეცხლი გახსნა და იყო ორმხრივი სროლა. შენობა ამ დროისთვის სრულად ევაკუირებულია.

სროლას ტვიტერზე გამოეხმაურა ამერიკის შეერთებული შტატების პრეზიდენტი, დონალდ ტრამპი:

"ცოტა ხნის წინ მაცნობეს YouTube-ის სათავო ოფისში მომხდარი შემთხვევის შესახებ. თანაგრძნობას ვუცხადებთ ყველას, ვინც ინციდენტს შეესწრო. მადლობა ჩვენს ფენომენალურ სამართალდამცავებს და მათ, ვინც ადგილზე პირველები მივიდნენ".

Youtube-ის სათავო ოფისი სან-ფრანცისკოდან 16 კილომეტრითაა დაშორებული. კომპანიას რამდენიმე ასული თანამშრომელი ჰყავს, ასე რომ, დაუდგენელია, მათგან რამდენი მუშაობს სათავო ოფისში