მიუღებელია სიტყვის და გამოხატვის თავისუფლების შეზღუდვა, ჟურნალისტის დაშინება და საქმიანობის ხელშეშლა - ოპოზიციურმა პოლიტიკურმა პარტიებმა რუსთავი 2-ის ჟურნალისტებზე თავდასხმასთან დაკავშირებით საერთო განცხადება გაავრცელეს.

განცხადებაში, რომელსაც ხელს 10 ოპოზიციური პარტია აწერს ნათქვამია, რომ აქციის ორგანიზატორი ქართული მარშის წევრები და სხვადასხვა რელიგიური ექსტრემისტრები ამ ქმედებით ბრძოლას უცხადებენ არა მხოლოდ ერთ კონკრეტულ მედიასაშუალებას, არამედ, ქართულ სახელმწიფოსაც და სახელმწიფოს შესაბამისი რეაგირება უნდა ჰქონდეს.

"ტელეკომპანიის ჟურნალისტისათვის მიყენებული ფიზიკური და სიტყვიერი შეურაცხყოფა, აგრეთვე, მისთვის უკანონოდ, ძალადობის გზით გადაადგილების თავისუფლების შეზღუდვა, ადასტურებს, რომ ძალადობის აქციის ორგანიზატორებს და მათ უკან მდგომ ძალებს სურთ ქვეყანაში ვითარების დესტაბილიზაცია და მათთვის მისაღებია ყველა აზრის თუ პოზიციის მხოლოდ ძალისმიერი გზით აღკვეთა."

ოპოზიციური პარტიების წარმომადგენლების თქმით აუცილებელია ხელისუფლების მყარი პოზიცია:

"სამწუხაროდ, ხელისუფლების ცალკეული წარმომადგენლები, საკუთარი ყოვლად უპასუხისმგებლო განცხადებებით, არათუ ემიჯნებიან ძალადობას, არამედ, რუსეთიდან მართულ ჯგუფებს აქეზებენ დამატებითი აგრესიის განხორციელებისათვის."

განცხადების ხელმომწერი პოლიტიკური პარტიები მოუწოდებენ ხელისუფლებას, რომ მკაცრად შეაფასოს ნებისმიერი ამგვარი ძალადობრივი ფაქტი და ჰქონდეს რეაგირება ჟურნალისტებზე თავდისხმის ფაქტზე.

განცხადების ხელმომწერი პარტიებია ნაციონალური მოძრაობა, ევროპული საქართველო, ახალი საქართველო, ევროპელი დემოკრატები, ეროვნულ-დემოკრატიული პარტია, თავისუფალი დემოკრატები, ლეიბორისტული პარტია, მოძრაობა სახელმწიფო ხალხისთვის, რესპუბლიკური პარტია, სამოქალაქო ალიანსი თავისუფლებისთვის.

19 მარტს, რუსთავი 2-ის ოფისის ეზოში შენობასთან შეკრებილმა ნეო-ნაცისტური დაჯგუფების, ქართული მარშის წევრებმა, ალყა შემოარტყეს ავტომობილს, რომელშიც ჟურნალისტი გიორგი გაბუნია და არხის იურისტი თამთა მურადაშვილი იმყოფებოდნენ. მათ სიტყვიერი შეურაცხყოფა მიაყენეს გიორგი გაბუნიას და შენობაში შესვლის შესაძლებლობა არ მისცეს.

ტელეკომპანია რუსთავი 2-ის შენობასთან ქართული მარშის 6 წევრი დააკავეს.