"ჩვენს სკოლაში რამდენიმე საგნის კვალიფიციური პედაგოგი არ გვყავს. დაწყებით კლასებში ბავშვებს წერა-კითხვას მედდა ასწავლის," - ამბობს დმანისის მუნიციპალიტეტის სოფელ ბაზაქლოს მკვიდრი სეიმურ მამედოვი.

სოფელი ბაზაქლო დმანისიდან 8 კმ-ის მოშორებით მდებარეობს. 2014 წლის საყოველთაო აღწერის მონაცემებით, სოფელში 532 ადამიანი ცხოვრობს. ბაზაქლოს საბაზო საჯარო სკოლა აზერბაიჯანულენოვანია.

კვალიფიციური, ახალგაზრდა პედაგოგების ნაკლებობა, რაც საქართველოს ზოგადსაგანმანათლებლო სკოლებისთვის უკვე დიდი ხნის პრობლემაა, განსაკუთრებით მკვეთრად ეთნიკური უმცირესობებით კომპაქტურად დასახლებულ რეგიონებში იგრძნობა. ქვემო ქართლში, სადაც მოსახლეობის დიდი ნაწილი ეთნიკური აზერბაიჯანელია, 1153 მასწავლებელი 61 წელს გადაცილებულია. სამოქალაქო ინტეგრაციისა და ეროვნებათაშორისი ურთიერთობების ცენტრის 2015 წლის ანგარიშის თანახმად, ეთნიკური უმცირესობებით დასახლებულ რეგიონებში დასაქმებულ მასწავლებელთა 58,6% 50 წელზე მეტი ხნისაა, 16,5% - 35 წლამდე ასაკის, 30% კი პენსიონერია. არაქართულენოვან სკოლებში ამჟამად დასაქმებული 36 მასწავლებელი 1923-1930 წლებშია დაბადებული. მათგან 31 ქვემო ქართლში მუშაობს.

კვალიფიციურ მასწავლებელთა დეფიციტის გამო აზერბაიჯანულენოვან სკოლებში სწავლების დონე ქართულენოვან სკოლებთან შედარებით დაბალია. ამის გამო, მშობელთა დიდი ნაწილი იძულებულია, რომ შვილი სასწავლებლად ქართულ სკოლაში გადაიყვანოს. აზერბაიჯანულიდან ქართულ სკოლაში ბავშვთა გადაყვანის კიდევ ერთი მთავარი მიზეზი ისიც არის, რომ ბევრი აზერბაიჯანულენოვანი სკოლის შენობა სავალალო მდგომარეობაშია.

სოფელ ბაზაქლოს მასწავლებელი შაჰხანიმ იუსუბოვა ამბობს, რომ აზერბაიჯანული ენის მასწავლებელთა დიდი ნაწილი ასაკოვანია და მალე მათ სკოლის დატოვება მოუწევთ: “ეთნიკურ აზერბაიჯანელ მოსწავლეებს მალე, შესაძლოა, აზერბაიჯანული ენის შესწავლის პრობლემა შეექმნათ. ბოლო წლებში ლიტერატურული აზერბაიჯანული ენის სწავლის დონე ისედაც ძალიან დაეცა.”

ბაზაქლოს მკვიდრი გადირ ვალიევი ამბობს, რომ მისი შვილები იძულებულები არიან სოფელ ოროზმანის აზერბაიჯანულენოვან სკოლაში იარონ:

“ჩვენს სკოლაში მასწავლებლები არ გვყვავდნენ, ამიტომ ახლა აქ ბავშვები 4 კლასის ჩათვლით სწავლობენ. იძულებულები ვართ, რომ შვილები სასწავლებლად სხვა სოფელში გავაგზავნოთ. მიკროავტობუსი ვიქირავეთ, რომელსაც ბავშვები ყოველდღე ზემო ოროზმანის სკოლაში მიჰყავს.”

განათლების დაბალი ხარისხისა და მოუწყობელი სასკოლო ინფრასტრუქტურის გამო აზერბაიჯანულენოვანი სკოლების მოსწავლეთა რაოდენობა სულ უფრო და უფრო მცირდება.

“მოსწავლეთა კონტიგენტის შემცირების გამო უახლოეს მომავალში ბევრი აზერბაიჯანულენოვანი სკოლა, შესაძლოა, საერთოდ დაიხუროს. ეს სერიოზული პრობლემა იქნება მომავალი თაობის განათლების საქმეში. არაქართულენოვანი სკოლების ახალი საკადრო რესურსით შევსებაზე ხელისუფლებამ დროულად უნდა იზრუნოს,” - აცხადებს საქართველოს აზერბაიჯანელთა კონგრესის თავმჯდომარე ჰუსეინ იუსუბოვი.